İşğal etilgen Qırımda Ukrayina Milliy gvardiyasınıñ Lasar’s Group mahsus bölügi ve 73-ünci deñiz mahsus operatsiyalar merkezi deñiz dronları yardımınen 100 million dollarlıq üç rus "Nebo-M" radiolokatsiya stantsiyasını yoq ettiler.
Orta küz ayınıñ 10-nda Brave1 Defense Tech Valley onlayn platformasında Lasar’s Group bölüginiñ tesisçisi Pavlo Yelizarov tafsilâtlıca bu aqqında tarif etti.
Ruslarnıñ malümatına köre, "Nebo-M" — eñ zemaneviy radiolokatsiya stantsiyalarından biridir, o, F-22 ve F-35 stealth uçaqlarını belgiley bile.
"Ukrayina arbiy hızmetçileri, stantsiyalarnıñ bulunğan Rusiye bazalarınıñ yerleri aqqında uydu malümatını aldılar ve deñiz dronlarını ağır bombalayıcı taşıyıcı olaraq qullanıp, yüksek doğrulıqlı ücümlerni yaptırdılar. Ücüm üç esas RLSnı yoq etip, Rusiye AMSnıñ ğururını yıqıp ketti", — dep Brave1niñ haberinde bildirildi.
Bu stantsiyalarnıñ tam olaraq ne vaqıt yoq etilgenini aytmaylar.
Hatırlatamız ki, orta küz ayınıñ 6-nda gece Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) ukrayin dronları tarafından urulğan soñ işğal etilgen Qırımdaki eñ büyük neft terminalı dört kündir yanıp tura. Neft bazasınıñ üstünde qara, tığız duman köterildi.
Bundan evel Bİİ bildirdi ki, ilk küz ayınıñ 21-nde "Prımarı" mahsus bölügi işğal etilgen Qırımda üç duşman Mi-8 çoq maqsatlı vertolötını ve qıymetli 55J6U "Nebo-U" Rusiye radiolokatsiya stantsiyasını urdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
