Rusiye mahkemesi tarafından 17 yılğa mahküm etilgen Qırım siyasiy mabüsi, bala idmancısı Emil Ziyadinov artıq bir yıldır Arhangelsk vilâyetiniñ Korâjma şeerindeki 5-nci müstemlekeniñ ceza izolâtorında buluna.
Onıñ apayı Elviye Ziyadinova "Qırım birdemligi"ne bunı bildirdi.
Onıñ aytqanına köre, 2024 senesi ilk küz ayında tüzetüv müstemlekesine etap etilgen soñ, aqayı ceza izolâtorına yerleştirildi.
"O, ilk küz ayında eki afta karantinde edi. Çıqqan soñ, birden ŞİZOğa tüşti. Çiçek ayında ameliyat yaptırmaq içün onı hastahanege avuştırdılar. Mayıs ayında qaytıp kelgen soñ, birden kene ŞİZOğa ketti. Emil özü de sebebini bilmey", — dep apayı tarif etti.
Ziyadinov ŞİZOda bulunğanı içün qorantasınen körüşüv aqqından marum qaldı, apishane tükânından kerekli şeylerni almaq içün para ya da posılka alamay. Elviyeniñ sözlerine köre, qorantası onı bir yıldan berli körmegen edi.
Emil Ziyadinov aqqında ne bilemiz
2020 senesi oraq ayınıñ 7-nde Emil Ziyadinovnıñ evi tintildi, bundan soñ onı apiske aldılar. "Dava" malümatına köre, qabaatlanğan şahıs yanında silâ, patlayıcı, arbiy yedekler yoq edi, terror aktını yapmaq niyeti yoq edi ve başqalarnı da terror aktına çağırmay edi. Amma onı Rusiyede yasaq etilgen "Hizb ut-Tahrir" terroristik teşkilâtınıñ teşkil etilmesinde ve akimiyetni zapt etüv azırlığında qabaatladılar.
2022 senesi çiçek ayınıñ 19-nda Cenübiy bölgeniñ arbiy mahkemesi Emil Ziyadinovnı 17 yılğa mahküm etti, ilk dört yılını apishanede, qalğan müddetini ise — sert rejimli müstemlekede keçirecek, bundan soñ bir yıl ve altı aydan soñ azatlığı sıñırlanacaq.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
