"Qırım yolbaşçısı" Sergey Aksönov ve diger işğalli memurlarğa qarşı yapılğan ücüm teşebbüsinde iştirak etkeni"nde qabaatlanğan ukrayinalı Denıs Petranov endi eki yıldır Rusiyede apiste buluna. O, halqara gumanitar qurulışlarğa muracaat etip, tutulğan ukrayinalılarğa yardım yollamağa rica etti.
"Qırım.Aqiqat"nıñ haber etkenine köre, Petranov bu muracaatnı soy-sopları vastasınen bildirdi.
Anda o, Rusiye Federatsiyasında azatlıqtan marum etüv yerlerinde olğan kritik şaraitni tarif etti.
"Aş ve suv keyfiyetleri pek fena. Bir çoq mabüsniñ iç çamaşırları ve yataqları yoq. Temizlik ve yuqunçtan qorçalav imkânları pek az. Em de eñ kerekli ilâclarnıñ qıtlığı bar. İnsanlarnıñ böyle dayanılmaz şaraitte tek ümüti — Qızıl Haç ve diger teşkilâtlar tarafından berilgen gumanitar yardım", — dep Petranov bildirdi.
Ukrayinalınıñ aytqanına köre, Rusiye ombudsmanı da apis şaraitine diqqat etmek kerek. Onıñ fikrine köre, bu meselelerge sistematik cevap berilse, azatlıqtan marum etilgen ukrayinlerniñ vaziyetini eyileştirmege yardım ete bilir.
Hatırlatamız ki, 2023 senesi mayıs ayında Rusiyeniñ "Nijniy Lars" keçit noqtasında Denıs Petranovnı yaqaladılar. Onı "patlayıcılarnı kontrabanda etüv"de qabaatladılar. Şimdi o, Rusiye quvetçileri tarafından, sanki Ukrayina istihbaratınıñ vazifesi boyunca, Sergey Aksönov, işğalli parlamentniñ spikeri Vladimir Konstantinov ve Yaltadaki Rusiye memuriyetiniñ yolbaşçısı Yanina Pavlenkoğa qarşı "diversiya azırlağanı"nda qabaatlanğan Qırım sakinlerine qarşı cinaiy davanıñ mabüsi ola.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
