Orta küz ayınıñ 15-nde Kıyivde, ukrayinlerni yarımadanıñ tamır halqları — qırımtatarlar, qaraylar ve qırımçaqlarnıñ tarihı ve medeniyetinen tanış etecek eki aftalıq "Qırım tamırları" sergisi başlanacaq.
Sergi sanat, tasil ve milliy mirasnı birleştirgen "Kitap-seyaat.Qırım tamırları" maarif ve medeniy leyhasınıñ bir parçası olacaq.
Sergide tamır halqlarınıñ medeniyetinen bağlı sözlerniñ "Elifbe"si, qırımtatar ressamı Rustem Skibinniñ eserleri, qaraylarnıñ milliy urbası, qırımtatarlarnıñ ananeviy urbasından ilhamlanğan Gaptulvalnyanıñ yapqanı anter kösterilecek.
Sergi açılışında Ukrayina tamır halqlarınıñ qoruvı aqqında munaqaşa keçirilecek.
"Ukrayinanıñ tarihı — bütün halqlarnıñ tarihı olğanını köstermege tırışamız. Qırımtatarlar, qaraylar ve qırımçaqlar — sayıları az, amma Ukrayina medeniyetine tesiri büyük. Maqsadımız — olarnıñ sesleri eşitilmesini temin etmek", — dep "Kitap-seyaat"nıñ tesisçisi İrına Taranenko bildirdi.
Leyhanıñ müellifleri qayd eteler ki, onıñ vazifesi — Qırımnı bilgi alanına qaytarmaq, tamır halqlarınıñ medeniyetini canlandırmaq ve şuralar stereotiplerini yoq etip, Qırım — Ukrayina olğanını köstermektir. 2001 senesiniñ ealiniñ cedvelge aluvına köre, Ukrayinada tahminen 250 biñ qırımtatar yaşay edi, qaraylar — tek biñge yaqın, qırımçaqlar ise - tahminen 400 kişi yaşay edi. Bu toplulıqlar dünyanıñ eñ az sayılı toplulıqlarından biri ola ve til ve medeniy mirasınıñ ğayıp olmasına alâ daa hassas qala.
Tedbir Gulliver ticaret merkezinde keçirilecek, kiriş ise bedava.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
