Rusiye tabiat nazirligi "Ayvanlarğa mesüliyetli munasebet aqqında" qanunına kirsetilgen deñişmelerni azırladı. Oña köre ev köpekleri ve mışıqlarını bir mikroçip ya da işaretnen qayd etmek kerek. Bunı em Rusiyede, em de Ukrayinanıñ vaqtınca işğal etilgen topraqlarında, şu cümleden Qırımda da, amelge keçirmege planlaştıralar.
Qırım Devlet veterinariya eyyetiniñ reisiniñ birinci muavini Anastasiya Lisovska-Çudınovıç RİA "Novosti Krım" Rusiye teşviqat haber agentligine bunı bildirdi.
Onıñ aytqanına köre, qanun leyhası al etile. Qanun leyhası, aşılav, sterilizatsiya ve tutuv şaraitini nezaret etmege imkân berecek yekâne bir cedvelniñ teşkil etilmesini közde tuta.
Başta köpeklerni sayıp başlaylar, soñ da mışıqlarnı. İdentifikatsiya, bir mikroçip ya da unikal nomeralı işaretnen yapılacaq. Malümatnıñ federal sistemasına kirsetilmesi bedava olacaq, çiplev protsedurasınıñ özü ise — para olacaq, dep Lisovska-Çudınovıç qoştı.
İşğal etilgen Qırımda çipniñ nomerasınen saipni belgilemege imkân bergen pilot qayd etüv sisteması çalışa. Ayvanlarnıñ malümatı "Hariot" federal malümat sistemasınıñ qısmına kirsetile, dep añlattı o.
Aynı zamanda, ayvanat hızmetiniñ vekilleri, insanlarğa yapılğan ücümlerniñ çoqusı köpeklerniñ saibleri olğanından sebep, saiplerniñ nezareti havfsızlıq meselesi olğanını qayd ettiler.
Hatırlatamız ki, "Sarı şerit" areketiniñ faalcileri işğal etilgen Qırımda ayvanlar içün resmiy sığınaqlar ve kerekli veterinar nezareti olmağanını bildirgen ediler. Şahsiy göñüllilerniñ meydanları sıq-sıq toldurıla ve sıq-sıq temel sağlıq ve havfsızlıq qaidelerine riayet etilmey.
Faalciler Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarındaki Orlıne köyündeki "Bim" sığınaqını misal olaraq ketire. Anda bala bağçasınıñ yanında 200-den ziyade köpek tutula, olarnı muntazam sürette yürmege yibere. Rusiye işğalli mahkemesiniñ 2022 senesi sığınaqnı qapatmaq qararına baqmadan, qarar yerine ketirilmey, "akimiyet" ise teşkerüvlerni taqlit ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
