Qırımtatar jurnalisti ve siyasiy mabüsi Remzi Bekirov "Serbest Qırımğa mektüpler" teşebbüsi çerçivesinde mektüplerge cevap berdi. Mektüpte o, ukrayinlerge qol tutqanları içün teşekkür bildirip, iman, sabır ve azatlıq ümüti aqqında fikirlerinen paylaştı.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
Remzi Bekirov — "Qırım birdemligi"niñ qırımtatar faalcisi, yarımadada Rusiye repressiyalarını belgilegen edi. 2019 senesi qırımtatarlarnıñ kütleviy tintüvleri vaqtında tutuldı, 2022 senesi Rostov-na-Donudaki Rusiye mahkemesi onı sert rejimli müstemlekede 19 yılğa üküm etti. O vaqıttan berli o, farqlı müstemlekeler arasında basqı ve ceza izolâtorlarına oğray.
"Serbest Qırımğa mektüpler" teşebbüsiniñ taqımınıñ alğanı mektüpte jurnalist ukrayinalılarğa minnetdarlığını bildirdi.
"Quran-ı Kerimde böyle buyurıla: "Yahşı söz, kökleri yerge dayanğan, dalları kökke uzanğan güzel bir ağaç kibi ola. Serbest olğanda bu sözler sade ola bile, amma mında, apishanede, olar yüregimizni aydınlata. Er keske qol tutqanları içün teşekkürler! Kameradaşlarım da yaratıcılığıñızğa qıymet kestiler. Olar, kimnen oturğanlarını ögrenip, kene şaşqan ediler", — dep Bekirov yazdı.
Mektübinde o, müstemleke şaraitinde nasıl etip içki muvazene ve imanını saqlamağa tırışqanını tarif etti.
"Apishaneniñ yahşı tarafları da bar. Mında faydalı qullanıla bilgen, meselâ, oqumaq içün bayağı boş vaqtım bar. Tekrarlanğan yaşayış, içtimaiy ağlar ve daimiy qavğalar yoq. Apishanede bir insan Rabbine yaqınlaşa, zayıflığını, sıñırlılığını ve ihtiyaclarını añlay. Dualar bir çeşit titremenen qılınır. Ve daa çoq tanışlıq bar. Altı yıl devamında pek çoq meraqlı insannen tanış oldım", — dep jurnalist qayd etti.
Mektüpniñ soñunda Bekirov, yaşağanı sınavlar ve adaletke olğan işanç aqqında fikirlerinen paylaştı.
"Bilem ki, bugün siziñ içün de, menim içün de qıyın. Ümüt etem ki, epimiz öz sınavlarımızdan keçip, dünyada barışıq tiklenir. Şeerlerde ve köylerde çeçekler açılacaq, balalar azbardalarda raatça oynaycaqlar. Ve men siziñ episiñizni menim tuvğan toprağımnı — Qırımnı — sırlar ve gizliler, inanılmaz tabiat ve acayip musafirperver insanlar memleketini ziyaret etmege davet etem", — dep yazdı o.
"Serbest Qırımğa mektüpler" teşebbüsi Ukrayina prezidentiniñ Qırım Muhtar Cumhuriyetindeki temsilciligi, Ukrain PEN ve ZMINA insan aqları merkezi tarafından teşkil etildi. Onıñ maqsadı — Rusiye tarafından Qırımda ya da öz toprağına çıqarılğan qanunsız sürgün etilgen Ukrayina vatandaşlarına qoltutmaqtır.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
