İşğalciler işğal etilgen Qırımdaki benzin stantsiyalarınıñ sayısını arttırmağa vade eteler, olarğa orta küz ayınıñ 10-ndan ve 20-nden başlap eki basamaqta benzin berilecek. Aynı zamanda "bir elge" künde 20 litr sıñırını lâğu etmege planlaştırmaylar.
İşğalli Qırım yolbaşçısı Sergey Aksönov Telegramda bunı bildirdi.
"Qırım Cumhuriyetiniñ yaqarlıq stantsiyalarında avtomobil yaqarlığınen bağlı vaziyetni üç basamaqta çezmege qarar alındı: orta küz ayınıñ 10-na qadar yaqarlıqnı serbest satqan yaqarlıq stantsiyalarınıñ sayısı ve künde 20 litrlik standart saqlanacaq; orta küz ayınıñ 10-ndan başlap, yaqarlıqnı serbest satqan ve belgilengen normağa köre berilgen yaqarlıq stantsiyalarınıñ sayısı arttırılacaq. Orta küz ayınıñ 20-nden başlap bu yaqarlıq stantsiyalarınıñ sayısı artacaq", — dep Aksönov bildirdi.
İşğalli akimiyetniñ malümatına köre, orta küz ayınıñ 4-nde işğal etilgen Qırımnıñ 69 benzin stantsiyasında benzin satıla. Satış noqtaları cedvelini Telegramda işğalli "Qırımnıñ Rusiye ükümetiniñ yolbaşçısı" Gotsanük derc etti. #LiberateCrimea aktsiyasınıñ Qırım faalcilerinden biri adını bildirmemek şartınen Qırım.Aqiqatqa añlattı ki, yarımadada soñki eki künde Aİ-100-den ğayrı, bütün çeşit benzin yoq.
"Bu haos. Qırımnıñ Rusiye yolbaşçısı Sergey Aksönov kerçekleşmegen beyanatlarnı yapa. Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda — terciman) Rusiye akimiyeti vaziyetke tesir etmek içün daa çoq küç kösterdi ve atta yaqarlıq fiyatlarınıñ eksilüvine irişti, amma anda da bölge daa küçüktir. Aksönov ise, yaqarlıq şirketlerine basqı yapıp, meseleniñ keskinligini eksiltmege tırışa, amma Qırımğa büyük Rusiye yaqarlıq şirketlerini celp etmek içün areketler yapıp olamay, çünki olar sanktsiyalardan qorqıp, işğal etilgen Qırımnen alâ daa iş tutmaylar. Bundan da ğayrı, Aksönovnıñ öz muracaatınen bütün Qırım yaqarlıq müessiseleri satıldı", — dep faalci tarif etti.
Onıñ aytqanına köre, yaqarlıq buhranı bütün Qırım sakinlerine tesir etti.
"Er kes zarar köre, tek aydavcılar degil. Cemaat naqliyatı sıqıştırıldı, çoq avtobus seferi lâğu etildi, hususan köylerdekiler. İnsanlar işke keç keleler. Bloger Gornıy Qırımdaki cemaat naqliyatınıñ inkişafını teklif etti. Aşayt fiyatları arttı, çünki malzemelerniñ ketirilmesi qıyınlaştı, bu sebepten ealiniñ narazılığı arta. Rusiye energetik qurulışına yapılğan ücümler tek istilâcı memleketniñ iqtisadiyatına degil de, Putinniñ avtoritar rejimine de büyük zarar ketire", — dep faalci qayd etti.
USQniñ Mahsus operatsiyalar quvetleri komandanlığındaki bölük olğan Milliy muqavemet merkezi bildirdi ki, işğalcilerniñ cemaat naqliyatı, içtimaiy obyektler, kommunal ve fevqulâde hızmetler içün benzin berilmesinde prioritet olğanını bildirgenine baqmadan, işğal etilgen Qırımda cemaat naqliyatınıñ sayısı eksilmekte.
"Vaqtınca işğal etilgen Qırım Muhtar Cumhuriyetinde yaqarlıq qıtlığı sebebinden cemaat naqliyatınıñ marşrutları qısqartıla. İşğalli akimiyetniñ esaplarına köre, ihtiyacnıñ 56%-i eksiktir. Yaqarlıq satılması sıñırlandı — er bir qullanıcığa 20 litr, çoq benzin stantsiyası qapatıldı. Ordu ve memuriyetniñ vazifelerine emiyet berile, şunıñ içün sakinler sıñırlavlarğa alışmaq mecburlar: uzun nevbetler, sıq yollar, daa qısqa seyaatlar", — dep haberde qayd etildi.
Arbiy deñiz quvetleriniñ matbuat nutuqçısı Dmıtro Pletçençuk "Birleşken haberler" telemarafonınıñ canlı yayınında ayttı ki, işğal etilgen Qırımda yaqarlıq qıtlığı yaqın vaqıtta yarımadadaki Rusiye ordusına da tesir etecek.
"Olarnıñ Ukrayinanıñ cenübiy işğal etilgen topraqlarında qurğanları demiryolnı qullanuvnen bağlı meseleler bar. Oña ücüm yapıldı. Sözde Qırım köpründen de fıçılarnen ketemezler. Qırımğa bazıda yaqarlıq ketirilse de, qıtlıq daa çoq duyulır. Orduda da, elbette, duyulır. İstisalnıñ bir qısmı, yani tahminen 25%-i bozulsa, bu er saada duyulır", — dep Pletençuk bildirdi.
"Qırım yeli" Telegram kanalınıñ menbalarına köre, işğal etilgen Qırımda yaqarlıq qıtlığı büyük şeerlerde degil de, yarımadanıñ çöl qısmında, Qurman rayonında qayd etile. Bunıñnen beraber, benzin talonlarını ve benzin stantsiyalarındaki nevbetlerge yerlerni satqan spekulântlar da bar.
Yaqarlıq tapmaq içün yarımadanıñ sakinleri yerlerge keteler, bir yerde toqtamamaq içün daa ucuz yerlerden yaqarlıq alalar. Qurman rayonındaki nevbetler ise "ayrı bir zevk": "bir litr içün 95 rublelik" АІ-95ni almaq içün saatlerce turalar. Büyük şeerlerde birinciden eer şey yahşı olğanı körüne, rusiye akimiyeti benzinniñ olğanı benzin stantsiyaları cedvelini de yayınlay. Aynı zamanda internette tek benzin talonlarını degil, benzin stantsiyalarındaki nevbetlerge yerlerni de satmağa başladılar", — deo kanal abunecileri bildirdiler.
Aynı zamanda işğal etilgen Herson vilâyetinde Özü özeni yanında 42 benzin stantsiyasından tek ekisi çalışmağa devam ete. Herson vilâyetiniñ işğalli "gubernatorı" Vladimir Saldonıñ malümatına köre, bu sebepten insanlar işğal etilgen topraqlarnıñ şarqına benzin almaq içün çıqmaq mecburlar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
