İşğalciler Qırım siyasiy mabüsi Vladıslav Afanasyevni rusiye vatandaşlığından marum ettiler. Keçenlerde onı "devlet hainligi" içün 15 senege mahküm ettiler.
Qırımtatar resurs merkeziniñ idare reisi, Qırımtatar Milliy Meclisiniñ azası Eskender Bariiev Facebookta bu aqqında haber berdi.
2025 senesi saban ayında işğalciler Vladıslav Afanasyevni RF CQniñ 275-nci maddesidevlet hainligine köre qanunsız şekilde mahküm ettiler. Şimdi ise Qırım işğal etilgen soñ onıñ alğanı rusiye pasportını aldılar. Eskender Bariiev bildirdi ki, 2025 senesi oraq ayından başlap ruslar, siyasiy mabüsler azat etilecek soñ yarımadağa, evlerine, qaytmamaları içün olarnı vatandaşlıqtan marum eteler.
"Qırımnı uyğun olmağan ve işğalni tanımağan ukrayin tarafdarı vatandaşlardan "temizlemek" içün 2025 senesi yazdan başlap işğalciler, RFda qanunsız ceza çekken soñ rejimge qarşılıq köstergen insanlarnıñ Qırımğa, evine, qaytmamaları içün cinaiy maddelerge köre mahküm etilgen Qırım siyasiy mabüslerini rusiye vatandaşlığından marum etmege başladılar", — dep Bariiev bildirdi.
Şimdi Vladıslav Afanasyev Tatarstandaki apishanede buluna ve sağlı meselelerini çeke.
"O, tuvğan Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) şeerinden biñlerce kilometr uzaqlıqta bulunğan Tatarstanda qanunsız ceza çeke. Onıñ ciddiy tiş meseleleri bar, çünki normal aşamağanı ve keyfiyetsiz suv sebebinden onıñ tişleri birer töküle. Bütün kün devamında oturmadan ve raatlanmadan ayaqta turmaq mecbur olğanına köre, ayaqları pek ağıra", — dep Bariiev siyasiy mabüsniñ alını añlattı.
2024 senesi yar mevsiminde Feodosiya (Kefe) şeerinde Valdıslav Afanasyev tutuldı. Bariievniñ malümatına köre, tevqifniñ sebebi oğlannıñ rusiye arbiy gemileriniñ fotoresimlerini çekmesi ve olarnen içtimaiy ağlarda paylaşması oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
