Devlet taqiqat bürosı, Rusiye "Rosteh" devlet korporatsiyasınıñ baş müdiri Sergey Çemezov ve Kreml oligarhı Yevgeniy Ginerge qarşı taqiqatnı yekünledi. Taqiqatnıñ malümatına köre, olar işğal etilgen Qırımda Rusiye ordusı içün energetika obyektlerini qurdılar ve arbiy patronlarnıñ istisalını teşkil etmege yardım ettiler.
DTBniñ resmiy saytında bu aqqında haber etildi.
"Taqiqatnıñ malümatına köre, 2019 senesi adamlar Rusiye Federatsiyasınıñ siyasiy yolbaşçılığınıñ işğal etilgen Qırım toprağı ve ealisine energetika saasında nezaret etüv planını ömürge keçirmege yardım etken ediler. Olar Balıqlava (Sevastopol PGU-SESSıcaqlıq elektrostantsiya) ve Tavriya SES (Simferopol PGU-SES) qurıp, devletimizge qarşı silâlı tecavuzda iştirak etken arbiy bölük ve qısımlar içün elektrik energiyasını temin etmek kerek ediler", — dep haberde qayd etildi.
Bundan da ğayrı, DTBnıñ malümatına köre, şübeliler "AO "L.N. Koşkin adına KBAL" şirketini "Rosteh" içün añlaşmalar yerine ketirgen teşkilâtlarnıñ cedveline kirsetti.
"Rusiye mütehassısları işhanede çeşit çeşit arbiy patronlarnıñ istisalını teşkil ettiler, em de olarnı istisal etmek içün tehnologiya ve donatmalarnı berdiler. 2022 senesinden başlap bugünge qadar mahsulat Ukrayinağa qarşı cenkleşken RF silâlı birleşmeleriniñ bölüklerine berile", — dep DTB qoştı.
2023 senesi Çemezov Rusiye baş nazirine Rusiye ükümetiniñ YouTube kanalında "Rosteh" devlet korporatsiyasınıñ 2022 senesi yapqan işleri aqqında esabat berdi, anda mahkeme tilşınaslıq ekspertizasınıñ neticelerine binaen, Rusiye Federatsiyasınıñ Ukrayinağa qarşı silâlı tecavuzını aqladı, dep DTB dava malümatlarına esaslanıp, bildirdi.
"Adamlar, insanlarnıñ ölümine ve diger ağır aqibetlerge ketirgen Anayasağa zıt kelgen Ukrayina toprağı ve devlet sıñırlarını deñiştirüv areketlerine yardım etüvde ve Rusiye Federatsiyasınıñ silâlı tecavuzını aqlağanında qabaatlaylar (Ukrayina CQniñ 27-nci maddesiniñ 5-nci qısmı, 110-ncı maddesiniñ 3-nic qısmı, 436-2 -nci maddesiniñ 3-nci qısmı). Qabaatlav vesiqası makemege yollanıldı", — dep büro bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
