Tasil, teşviqat ve repressiyalar vastasınen balalar ve gençlerge tesir eterek, işğal etilgen topraqlarda, şu cümleden Qırımda, Rusiye "aşırıcılıqnen küreşkeni" kibi ukrayin kimligini yoq ete.
"Almenda" CTnıñ mütehassısları öz analitik esabatını taqdim etkende bunı bildirdi.
Olarnıñ aytqanlarına köre, Rusiye "aşırıclıq"qa qarşılıq köstermek içün, balalar ve gençlerge mefküreviy ikâyelerni zorlayıp, ukrayin kimliginiñ er angi ifadelerine qarşı küreşe. Rusiye Federatsiyası "aşırıcılıq" añlamını mümkün olğanı qadar keñ añlay.
"Ruslar içün aşırıcılıqqa qarşılıq — bu Rusiye Federatsiyasınıñ mefküreviy siyasetine qarşılıq köstergen er angi mualifetke qarşılıqtır. Buña radikallik, rusfobiya ve atta Rusiyege qarşı duşmanlıq kirsetile", — dep esabatnıñ müellifi, "Almenda" mütehassısı Mariya Krasnenko qayd etti.
Onıñ aytqanına köre, Moskva Ukrayinanı "aşırıcı telükeler"niñ esas menbası olaraq adlandıra.
"Qanunlar ve strategik vesiqalardan başlap, metodik añlatmalar ve atta maarif kurslarında Ukrayina rusfobiya merkezi olaraq kösterile", — dep qayd etti o.
Teşkilâtnıñ vesiqalı müellifi Tetâna Lıçko, Rusiye tasil sistemasınıñ teşviqat içün esas alet olğanına diqqat çekti.
"Rusiye Federatsiyasında tasil terrorizm ya da qaşırıcılıqnen küreşte degil de, ukrayin nazar noqtasına qarşı qullanılğan bir alet ola", — dep Lıçko qayd etti.
O, Rusiye mahsus hızmetleriniñ iştirakinen "Bilgi cemiyeti" tarafından azırlanğan "Neonatsizm mefküresiniñ balalar ve gençler arasında tarqaluvınıñ ögüni aluv" mahsus kursını misal olaraq ketirdi. Lıçko ayttı ki, bu kursnı 62 biñden ziyade diñleyici keçti, olarnıñ çoqusı — ocalar.
"Kurs malümatında ukrayin vatanperverligi neonatsizmge teñ kele, Ukrayina devleti ise Rusiyeniñ duşmanları tarafından suniy yaratılğan dep adlandırıla", — dep qayd etti o.
"Almenda" teşkilâtınıñ milliy adliye idaresiniñ reberi Valentına Potapova qayd etti ki, 2022 senesinden soñ Rusiye "yımşaq" tesir usullarından sert usullarğa keçti.
"Biz basqı, qorquzuv, memuriy ve cinaiy mesüliyet şekillerine rastkele. Bunı açıqtan aytmaq kerekmiz", — dep qayd etti o.
Mütehassıs, işğal etilgen topraqlardaki balalar ayrı diqqatqa muhtac olğanını qayd etti.
"Bu topraqlarda tahminen 6 million ukrayinalı buluna, olardan bir buçuq milliondan ziyadesi — balalar. Ve bu balalar daima qorqu içinde yaşaylar — atta sarı ve mavı çorapnı tesadüfen kiygenleri içün memuriy ya da cinaiy mesüliyetke çekile bile", — dep qayd etti o.
Valentına Potapova işğal altındaki ukrayinlerniñ ayatı aqqında malümat toplav ve talil etüv devlet sistemasınıñ kerekligini qayd etti.
"İşğal etilgen topraqlarda insanlarımıznıñ vaziyetini devlet nezareti altında tutmaq kerekmiz. Men tek balalar aqqında aytmayım, men işğal etilgen topraqlar aqqında haberler kerek olğanını aytam. Bu esabatlar bizde ya müdirlikler, ya da Ukrayina nazirlikleriniñ bölükleri ya da bölükleri peyda olğanına qadar peyda olmaycaq. Ve bu mesele çezilmek kerek", — dep qoştı o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
