Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeer şurasınıñ VI çağıruv mebusı devlet hainligiUkrayina CQniñ 111-nci maddesiniñ 1-nci qısmı içün 11 yıllıq apis cezasına mahküm etildi. Öz areketlerinen Ukrayina suvereniteti ve topraq bütünligine zarar ketirdi.
Qırım MC ve Sevastopol (Aqyar) şeeri prokurorlığı bunı bildirdi.
Suspilne Qırım menbalarınıñ malümatına köre, söz Leonid Junko aqqında kete. O, Ukrayina Prezidentiniñ Qırım Muhtar Cumhuriyetindeki Temsilcisi vazifesini de eda etken edi.
Taqiqat malümatına köre, 1999-2005 seneleri mahküm etilgen adam Sevastopol (Aqyar) şeer yolbaşçısı, 2008-2010 seneleri ise — Ukrayina Prezidentiniñ Qırım Muhtar Cumhuriyetindeki vekili vazifesini eda etken edi.
Prokurorlar, 2014 senesi saban ayında Junko şeer şurasınıñ toplaşuvında iştirak etip, "Umumiy Qırım referendumınıñ keçirilmesinde iştirak etüv aqqında" qararına qol tutqanını isbatladı. Bundan da ğayrı, o, yarımadanıñ Rusiye Federatsiyasınıñ terkibine kirmesini közde tutqan "Qırım Muhtar Cumhuriyeti ve Sevastopolnıñ mustaqilligi aqqında beyannameniñ" qabul etilmesi içün rey berdi.
Mahküm etilgen adam Ukrayina Prezidentiniñ Fermanınen kirsetilgen müddetsiz şahsiy sanktsiyalarğa oğray.
Qırım MC ve Sevastopol (Aqyar) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
