2025 senesi ilk küz ayınıñ 22-nde Zürihteki Milletler Sarayında BMTnıñ İnsan aqları şurasınıñ 60-ncı sessiyası devamında Rusiyedeki ve işğal etilgen Qırımdaki insan aqları vaziyetine bağışlanğan parallel tedbir keçirildi. Onı Avstriya, Belçika, Felemenk, Lüksemburg ve Poloniya teşkil ettiler.
Qırım.Aqiqat mühbiri bunı bildirdi.
Rusiyedeki insan aqları mahsus maruzacısı Mariana Katsarova 2024 senesiniñ ortasından 2025 senesiniñ arman ayına qadar repressiyalarnıñ quvetleşkenini qayd etti. Onıñ aytqanına köre, "çetel agentleri", " istenilmegen teşkilâtlar" ve "sahte haberler" aqqında qanunlar jurnalistler, faalciler ve vatandaş cemiyetini taqip etmek içün bir alet oldı.
Katsarova qayd etti ki, Rusiye mahkemeleri cezalarnı işkence altında alınğan delillerge esaslanıp qabul ete, ve bu Rusiye nezaretindeki Qırım "mahkemeleri"nde de bar.
Tedbirde Nobel mukâfatınıñ laureatı Svitlana Aleksiyevıç, yazıcı Boris Akunin, Radio Svobodanıñ jurnalisti Alsu Kurmaşeva ve Qırım.Aqiqat jurnalisti Vladıslav Yesıpenko çıqışta bulundılar.
Öz çıqışında Yesıpenko Kremlniñ Qırım mabüsleri — Ğalına Dovğopola ve Kostântın Şırinğni, em de Rusiye apishanelerinde bulunğan ya da elâk olğan jurnalist ve faalcilerni añdı. Onıñ aytqanına köre, bu insanlarnıñ ikâyeleri — hususan Qırım mabüsleriniñkiler — kimseni lâqayt qaldırmadı.
Yesıpenko qayd etti ki, Qırım siyasiy mabüslerini azat etmek, em cebede, em de haber boşluğında rusiye tecavuzına qarşılıq köstermek içün halqara destek kritik şekilde kereklidir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
