14 yılğa mahküm etilgen qırımtatar Rustem Seithalilovnıñ apayı Rusiye kontrolindeki Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) Kıyiv rayon mahkemesinde, aqayını Petrozavodsk müstemlekesinden işğal etilgen Qırımğa yaqın olğan müstemlekege avuştırmaq talabınen dava açtı.
"Qırım birdemligi", siyasiy mabüsniñ apayı Elzara Seithalilovanıñ sözlerine esaslanıp, dava açılğanını haber etti.
Onıñ sözlerine köre, mahkeme arizasını ilk küz ayınıñ 19-nda poçta vastasınen yolladı.
Şimdi Rustem Seithalilov 9-ncı Petrozavodsk tüzetüv müstemlekesinde ceza çeke. Aile onı ziyaret etmek içün 2,5 biñ kilometrlik mesafeni eki-üç kere keçmek kerek, çünki Simferopol (Aqmescit) ve Petrozavodsk arasında doğru seferler yoq.
"Balaları ve daa çoq ana-babası içün bu mesafeni yeñmek pek qıyın, imkânı olsa ise , o, tuvğanlarını körmege istey", — dep mabüsniñ apayı tarif etti.
Hatırlatamız ki, 2024 senesi çiçek ayınıñ 17-nde Rusiye Yuqarı mahkemesi beş qırımtatar — Akim Bekirov, Asan Yanikov, Eskender Süleymanov, Rustem Seithalilov ve Seytveli Seitabdiyevniñ kassatsiya şikâyetlerini red etip, olarnıñ ükümlerini deñiştirmeden qarar berdi.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Ruslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
