Kütleviy askerlikke çağıruv şeadetnamesiniñ elektron cedveli, musafirhanelerde ve qurucılıq meydanlarında keçirilgen tintüvler, topraq öz-özüni mudafaa organlarına qoşulmaq teşviqatı — işğal etilgen Qırımda işğalciler tarafından qullanılğan mecburiy qanunsız kütleviy askerlikke çağıruv usullarıdır. 2015 senesinden başlap Qırımda olar Rusiye ordusına 21 askerlikke çağıruv kampaniyasını keçirdiler, yarımadanıñ 50 biñden ziyade sakini askerlikke alındı, olardan tahminen 5,5 biñ-i — 2024 senesi.
İşğalcilerniñ Rusiye ordusını işğal etilgen Qırım sakinleri esabına qanunsız şekilde toldurğanları aqqında Ukrayina prezidentiniñ Qırım Muhtar Cumhuriyetindeki temsilciligi bildirdi.
2025 senesi arman-ilk küz aylarında işğal etilgen Qırımda işğalcilerniñ quvet strukturalarınıñ reydleri olıp keçti, dep temsilcilik bildirdi. Arbiy cedvelde olmağanlarnı tapmaq içün qurucılıq meydanları, yataqhaneler, daireler ve vaqtınca yaşağan yerler tintildi.
"Tintüvlerniñ sistematik hususiyeti, RF silâlı quvetlerinde hızmet etmek içün añlaşma imzalağanı içün berilgen büyük para mukâfatları bile kerekli sayıda göñüllilerni temin etmegenini köstere. İşğalli memuriyet, adet üzre qullanğan usullarını qullana: insanlarnı memuriy basqı altında, cinaiy taqip, vatandaşlıqtan marum etüv ya da askerlikten vazgeçkenleri içün sürgün etüv telükelerinen beraber, arbiy añlaşmalarnı imzalamağa mecbur ete", — dep temsilcilik añlattı.
İlk küz ayınıñ 9-10. künleri işğal etilgen Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) Rusiye quvetçileri "qanunsız migrantlar" ve arbiy cedvelde olmağan vatandaşlarnı teşkermege başladılar. Qurucılıq meydançıqlarından birinde 12 adamnı teşkerdiler, olarnıñ arasında üç Özbekistan vatandaşı bar edi — işğalli organlar olarğa qoşma talaplar qoydı, dep temsilcilik bildirdi.
"İlk küz ayınıñ 10-na keçer gecesi Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki — terciman) musafirhanelerden birinde işğalli quvetçiler, vesiqalarınıñ müddeti keçken bir ecnebiyni tapıp, bunı basqı içün sebep olaraq qullandılar. Hususan, Orta Asiya memleketlerinden kelgen ecnebiy vatandaşlar zarar köre bileler. Olar içün vesiqalarnen bağlı yapma meselelerni yaratalar ve hızmet içün "çaresi"ni teklif eteler. Halqnıñ eñ zayıf gruppalarını cenk içün malzemeler olaraq qullanuvnıñ tsinik bir ameliyatıdır", — dep prezidentniñ temsilciligi qayd etti.
Bundan ğayrı, Rusiyede işğal etilgen Qırım toprağında da çalışqan kütlevit askerlikke çağıruv şeadetnameleriniñ elektron cedveli çalışıp başladı. Şimdi qabaatlav arizası tek elge degil de, "Devlet hızmetleri" portalındaki elektron kabinetke de kele bile. O peyda olğanından başlap, insan içün avtomatik olaraq sıñırlavlar kirsetile: Rusiye Federatsiyasından tış çıqış yasağı, ayrı aqlarnıñ blok etilmesi, kelmegen taqdirde ise — qoşma sıñırlavlar.
"Askerlikke çağıruv şeadetnamesinden qaçmaq imkânsız, yarımadanı terk etmek ıntıluvları ise pek qıyın. Bazı kütleviy haber vastaları, "devlet hızmetleri" vastasınen arbiy cedvelge kirsetilmek içün ariza bergen soñ, erkekler olarnı RF Mudafaa nazirliginiñ muqavele mütehassısı olaraq, razılıqsız qayd etkenini ögrengenleri aqqında bildire. Belli bir Ukrayina vatandaşı olğan yigitniñ alı, ciddiy sağlıq meseleleri ve açıq yürek ameliyatına baqmadan, işğalli eyyet tarafından eki kere "sıñırlı şekilde uyğun" dep tanıldı. O, red etmege tırışqanda, işğalciler oña açıqtan-açıq ayttılar: "sen endi muqaveledarsıñ, qaç". Çıqmağa tırışqanda onı FSB sıñırcıları tuttı, bir qaç saat sorğuğa çekti, aşağıladı, soñra yiberdi", — dep temsilcilik tarif etti.
İşğalciler yerli ealiniñ "Bars-Krım" topraq mudafaasınıñ teşkil etilmesine isteknen qoşulğanı aqqında faal şekilde "raport" eteler. Rusiye işğalli rejimi temsilcileriniñ bildirgenine köre, bölükte komandanlar ve tibbiy bölük ile tam bir arbiy iyerarhiya çalışa, yañı askerler taktik tibbiyet beceriklerini ve uçucısız uçaq aletleriniñ uçuruvını ögrene. "Bars-Krım" iştirakçileri işğalli ordu ve Rosgvardiya strukturalarınen faal surette işbirlikte bulunalar.
"Bars-Krım" bölüklerine qoşulmaq içün esas sebeplerden biri — işğal altındaki ealiniñ topraq mudafaa bölüklerinde hızmet etmesi olarnı muntazam Rusiye arbiy bölüklerine celp etilüvden ve cebege yollanılmasından qorçalaycaq olğan ümütidir. İnsanlar bu kibi şekillendirmelerni, faal cenk areketlerine doğrudan qoşulmaq istiqbalinen qıyaslağanda, "eñ küçük bir yamanlıq" olaraq köreler. Amma Rusiye ordusınıñ alında kritik vaziyet olsa, "Bars-Krım" bölükleri, azırlanğan ve teşkil etilgen arbiy birleşmeler olaraq, faal arbiy areketler alanına avuştırılmaq içün birinci nevbette olğan namzetler ola bile", — dep Ukrayina prezidentiniñ temsilciligi emin.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
