Azaq ve Qara deñizlerinde işğalciler yañı qaidelerni kirseteler — 40 yıldan ziyade gemilerge limanlarğa kirmege yasaq eteler. Balıqçılıq saasındaki iş adamlarınıñ 2030 senesi qara qış ayınıñ 1-ne qadar gemilerni yañartmaq aqqı bar. Lâkin vaziyet öyle oldı ki, Qırım sakinlerine flotunı yañartmaq içün grantlar yetmey, balıq satıluvından ise kâr yoq, çünki tutuv sıñırları ve alçaq satış fiyatları bar.
Ukrayina Tış istihbarat hızmeti bunı bildirdi.
"Qara ve Azaq deñizleriniñ balıqçıları işsiz qala bileler, Ukrayinağa qarşı cenk maşnasına para yollağan memleketniñ ealisi ise balıqsız qala bile. Sebebi — flotnıñ qullanuv müddeti sıñırlanğanı sebebinden işlerniñ toqtatılmasıdır", — dep istihbarat añlattı.
UTİİniñ malümatına köre, bugün Rusiye deñiz flotunıñ sanayı gemileriniñ sayısı 820-830 teşkil ete, ve olarnıñ 65%-i 30 yaşından büyük, 13%-i — 40 yaşından büyüktir. 2030 senesine qadar 40 yaşından büyük olğan gemilerniñ sayısı 533 olacaq.
"Amma işke tüşürilgen balıqçılıq flotunıñ çoqusı, atta büyük yañartmalar yapılğan olsa bile, tam olaraq çalışıp olamaz. Balıqçılıqnıñ toqtatılmasınıñ resmiy sebebi, 2030 senesi qara qış ayınıñ 1-den başlap 40 yaşından büyük bütün gemilerniñ Rusiye limanlarına kiriş yasağıdır. Kerçekten de, Azaq-Qara deñiz havzasında çalışqan balıqçılıq şirketleri devletniñ flotunı yañartmaq programması çerçivesinde çalışmay. Bölgede balıq mahsulatınıñ fiyatları Rusiyede eñ alçaq ola ve yerli balıqçılarğa yañı gemilerni satın almağa imkân bermey", — dep UTİİ añlattı.
İşğalcilerniñ şirketlerge ayırğan paraları, yañı gemilerniñ satın alınmasına degil de, iş ve gemilerniñ tamir etilmesine sarf etile. Misal olaraq, 2025 senesi Rusiye işğal etilgen Qırım, Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Rusiyeniñ Krasnodar ülkesiniñ bütün şirketlerine 240 million ruble (tahminen 96 million ğrıvnâ — muar.) ayırdı.
Daa evel Qırım.Aqiqat bildirdi ki, Qırımdaki balıqçılarnıñ 2022 senesinden başlap, cenk areketleri sebebinden çalışmaq imkânları sıñırlandı.
"Rusiyeniñ Ukraiynağa istilâsından evel yarımadada balıqçılıq saasındaki buhran yüz bergen edi. O, Rusiye yarımadanı işğal etken soñ peyda oldı. Balıqçılıq gemileri ve sanayı küçü, halqara sanktsiyalar sebebinden sıñırlanğan satış bazarları, Azaq-Qara deñiz havzasında suv resurslarınıñ çıqarılmasınıñ eksilmesine ketirdi. Rusiyeniñ Ukrayinağa tolu miqyaslı istilâsınıñ başlanması balıqçılıq müessiseleriniñ işini uzun müddetke toqtattı. Olar, ihtiyaclarını temin etmegen rusiye grantlarına esaslanıp yaşamağa mecbur qaldılar. Bundan soñ Qırım balıqçılarına Qara deñizniñ ayrı bir qısmında balıq tutmağa izin berildi", — dep neşir yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
