UHH bildirdi ki, tahqiqatçılar işğal etilgen Qırımda ruslarğa yardım etken 22 insanğa dair deliller topladılar. Bular esasen sabıq ukrayin uquq qorçalayıcıları, mahkemecileri, memurları ve mebusları. Olarnı devlet hainligi, duşmannen işbirlik faaliyeti, Ukrayina topraq bütünligi ve toqunılmazlığına qast etüvde qabaatlaylar.
UHHniñ Qırım Muhtar Cumhuriyetindeki Baş idaresiniñ matbuat hızmeti bunı bildirdi.
Mahsus hızmetniñ malümatına köre, şübhe Qırım balalarını Rusiye tibbiy batalyonlarında hızmet etmek içün azırlağan "Yunarmiya" tibbiy bölüginiñ işğal etilgen Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) yolbaşçısına bildirildi.
Cinaiy davanıñ daa bir iştirakçisi — şimdi "Qırım Cumhuriyeti Nazirler şurasınıñ reisiniñ muavini" olğan sabıq "Qırım mülkiyet ve topraq munasebetleri naziri"dir. O, UHHniñ malümatına köre, Rusiye arbiy hızmetçileriniñ "mükafatlandırılması"nı teşkil ete, hususan olarğa yarımadada topraq damartılarını bere.
Bundan ğayrı, UHH, "Qırım Cumhuriyeti cemaat palatası"nıñ sabıq azası olğan ve bütün Ukrayina topraqlarını zapt etmege çağırğan ve Rusiye Federatsiyasınıñ vatandaş obyektlerine raketa ücümlerini aqlağan yerli teşviqatçınıñ cinaiy faaliyeti aqqında malümatnı elde etti.
Bundan da ğayrı, dava malümatlarında işğalli akimiyet organları, uquq qorçalayıcı organları ve mahkeme sisteması temsilcileri aqqında aytıla — episi milliy havfsızlıq esaslarına qarşı cinayetlerde şübhe bildirildi.
"Qabaatlanğanlar arasında, yarımada zapt etilgen soñ antını bozıp, Rusiyege keçken Ukrayina İçki işler nazirliginiñ 7 sabıq hadimi bar. Olar "filtratsiya" gruppalarınıñ azası ediler ve yerli sakinlerni Ukrayina tarafdarı olğanları içün taqip ete ediler. Şimdi olar Qırımdaki "Rusiye İçki işler nazirligi"niñ bölge bölüklerinde yolbaşçılıq vazifelerinde bulunalar", — dep UHH bildirdi.
Qırımdan daa üç işğalli mahkemecige şübhe bildirildi. Açıqlanğan diger şahıslar — akimiyetniñ farqlı seviyedeki yerli "mebusları"dır.
"UHHniñ taqiqatçıları duşman tarafdarlarına Ukrayina Ceza qanunnamesiniñ 111 maddesiniñ 1-inci qısmı (devlet hainligi), 110 maddesiniñ 1-inci qısmı (Ukrayinanıñ topraq bütünligi ve toqunılmazlığına tecavuz), 111-1 maddesiniñ 5-inci qısmı, 6-ncı qısmı, 7-nci qısmı (duşmannen işdeşlik faaliyeti), 436-2 maddesiniñ 3-ünci qısmı (Rusiye Federatsiyasınıñ Ukrayinağa qarşı silâlı tecavuzınıñ aqlanuvı, qanuniy tanılması, red etilmesi, onıñ iştirakçileriniñ şereflendirilmesi) boyunca işlengen cinayetler aqqında malümat berdiler", — dep UHH bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
