İşğalli Qırım akimiyeti yaqarlıq stantsiyasını temin etüv meselesini çezmege vade etse de, işğal etilgen yarımadanıñ sakinleri aksine bildireler. İşğal altındaki Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) A92 ve A95 benzinleri aman-aman yoq, dizel yaqarlığınıñ qıtlığı da bar.
2025 senesi arman ayınıñ 4-nde "Sarı şerit" areketiniñ faalcileri işğal etilgen Sevastopolnıñ (Aqyarnıñ) benzin stantsiyasında yaqarlıq qıtlığı aqqında bildirdiler.
"Sevastopol. Şeherde aman-aman iç bir yerde 95 ya da 92 benzini yoq. "Sarı şerit" faallcieri dizelnen de mesele olğanını bildireler. Rusiyede yaqarlıq qıtlığı olğanda, eñ başta olar işğal etilgen Ukrayina topraqlarına ücüm eteler. Qırımğa iç bir şey ketirilmey, çünki Rusiyeniñ er angi bölgesi Rusiye içün daa müimdir. Federal haberlerde Qırım meseleleri aqqında bir şey aytılmay. Resimni bozmamaq içün", — dep areketniñ faalcileri bildirdiler.
Arman ayınñ 3-nde işğalli Sevastopol (Aqyar) "gubernatorı" Razvojayev Aqyarda benzin stantsiyasında mesele olmağanını bildirdi.
"Bugün (2025 senesi ilk küz ayınıñ 3-ü — muar.) Sevastopolda (Aqyarda — terciman) benzin qıtlığınen mesele yoq — şeher eñ az bir aftalıq er çeşit yaqarlıqnen teminlengen. Aynı zamanda, logistika meselesi alâ daa bar: teminat esasen deñiz yolunen yapıla, amma umumen vaziyet nezaret altında", — dep işğalli memur bildirdi.
Hatırlatamız ki, yaznıñ soñunda işğal etilgen Qırımda yaqarlıq buhranı kerginleşti. Oraq ayınıñ 29-ndan itibaren Rusiye Federatsiyası, merkeziy bölgelerge ketirüvlerni deñiştirmek içün benzin ihracatını yasaq etti. Neticesinde, vaqtınca işğal etilgen topraqlar, hususan Qırım, yeterli derecede yaqarlıqnen temin etilmey qaldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
