Rusiye, vaqtınca işğal etilgen topraqlarda, hususan Qırımda, ukrayinalılarnı daa tez askerlikke kütleviy çağırmağa planlaştıra.
Milliy muqavemet merkezi bunı bildirdi.
"Kreml işğal etilgen topraqlarda askerlikke kütleviy çağıruv planlarını arttırmağa azırlana. Adet üzre, imperatorlıq esirlerniñ qollarınen cenkleşe, ukrayinalılarnıñ ölümi ise er angi şaraitte oña fayda ketire. Resurslarnıñ yetmemezligi sebebinden işğalciler añlaşma imzalağanlarnı zorlaycaqlar, tutulğan ve apiske alınğanlarnı şantaj etecekler", — dep haberde qayd etildi.
Hatırlatamız ki, evelden MMM bildirdi ki, işğal etilgen Qırımda talebelerni avuştırmaq içün aydavcılar yetmey. 547 mektepniñ avtobusınıñ tek yarısında aydavcı bar. Milliy muqavemet merkezi bildirdi ki, işğalciler mektep avtobuslarınıñ aydavcılarını celp eteler. Bundan da ğayrı, böyle avtobuslarda yolculıq tehnikiy bozuqlıqlar sebebinden telükeli ola.
Qırım uquq qorçalayıcı gruppasınıñ malümatına köre, 2025 seneleri çiçek-ilk yaz ayları arasında işğalli Qırım mahkemeleri tarafından eñ az 36 "askerlikke kütleviy çağıruvdan vazgeçüv" davası baqıldı.
Hususan, QUQGnıñ malümatına köre, üç ay içinde işğalli birinci instantsiya mahkemeleri 23 qabaatlav qararını çıqardı, apellâtsiya instantsiyasınıñ 4 qararı bar, 9 dava "mahkemeler"de baqıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
