"Serbest Qırımğa mektüpler" teşebbüsi çerçivesinde sabıq siyasiy mabüs, faalci ve "Qırım.Aqiqat" jurnalisti Vladıslav Yesıpenko, Rusiye tarafından "devlet hainligi"nde qanunsız qabaatlanıp, 12 yılğa mahküm etilgen Kreml reinesi Ğalına Dovğopolağa öz muracaatını oqudı.
Ukrayina prezidentiniñ Qırımdaki temsilciligi İnstagramda bu aqqında haber etti.
Vladıslav Yesıpenko ve Ğalına Dovğopolova işğal etilgen Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) 1-nci SİZOda beraber ediler.
"O vaqıt devamında olar pek yaqınlaştılar — Vladıslav Ğalınanı qardaşım dep adlay ve onen beraber sıcaq yaz künlerini hatırlay, o vaqıt olar kamera qapılarınıñ açıq "yemlikler" vastasınen bir-birinen laf ete ediler. Şimdi, azatlıqta bulunğan Vladıslav Yesıpenko, dostuna mektüpler yaza ve onı serbest Ukrayinada körmege ümüt ete", — dep temsilcilikniñ haberinde qayd etildi.
Hatırlatamız ki, Vladıslav Yesıpenko bildirdi ki, Dovğopolovanıñ bulunğanı tüzetüv müstemlekesinde tutulğan insanlarğa esaslanıp, altı yıldan berli apishanede bulunğan Qırım siyasiy mabüsiniñ sağlıq vaziyeti fenalaştı: tayaqqa esaslanıp zornen areket ete.
"Onı acele olaraq nevrolog baqmalı. Ğalınanıñ tişi de qırılğan (yerinde añlaşılmağan bir demir şey bar) — bu, Putinniñ Rusiye tarafdarı olğan qadınğa sert cevap bermesiniñ neticesidir, o da uruşqa başladı", — dep Yesıpenko, reineni ziyaret etken insanlarnıñ aytqanlarını bildirdi.
Ğalına Dovğopola aqqında ne bilemiz
Ğalına Dovğopola Bağçasarayda doğdı, soñra Sevastopolda (Aqyarda) yaşadı. 2014 senesi, Qırım işğal etilgen soñ, "Gordon" neşirine bergen izaatında qadın küçük biznesi bar olğanını ayttı — turistik mevsimde raatlanıcılarğa ev kiralay edi. Onıñ qızı gazeta tükânınıñ saibi edi, anda o, 2014 senesi ukrayin matbuatını sata edi. Ruslarnıñ qorqutmaları sebebinden qızı torunınen beraber Qırımdan kettiler, Ğalına ise evini terk etip olamayıp, qaldı.
2019 senesi boş aynıñ 27-nde FSB hadimleri onıñ evine keldiler, 66 yaşındaki Ğalına Dovğopolunı tuttılar. O, ukrayin istihbaratınen işbirlik yapqanında qabaatlandı. İşğalli tahqiqatnıñ versiyasına köre, o, Rusiye Qara deñiz flotunıñ bölükleri aqqında gizli malümatnı bere edi.
Dovğopola — siyasiy sebeplerden böyle bir dava açılğan ilk qadınlardan biri edi. Ğalına hanım aqqında çoq şey belli degil, mahkeme oturışları qapalı rejimde keçirile edi. Moskvağa barğan soñ oña Ukrayina konsulı çoq vaqıt kirsetilmedi, onıñ mektüpleri ise endi siyrek kele.
Dava deral gizli tutıldı, mahkeme oturışları qapalı şekilde keçirildi. Ukrayina uquq qorçalayıcıları çoq bozuv aqqında bildireler.
İşğalciler onı "devlet hainligi" içün 12 yılğa mahküm ettiler.
2021 senesi ilk küz ayında Ğalına Dovğopola Lefortovodan Rusiye Federatsiyasınıñ Vladimir vilâyetindeki Golovino şeherindeki 1-nci tüzetüv müstemlekesine etap etildi.
Vladıslav Yesıpenko — Qırım.Aqiqat leyhasınıñ serbest jurnalisti, dört yıldan ziyade Rusiye apishanesinde tutuldı. 2025 senesi arman ayınıñ 1-nde Ukrayinağa keldi, onı Kıyiv demiryol vokzalında zenaatdaşları, uquq qorçalayıcılar ve media toplulığınıñ vekilleri qarşıladılar.
Vladıslav Yesıpenko aqqında ne bilemiz
Vladıslav Yesıpenko - "Qırım.Aqiqat"nıñ "Radio Svoboda" leyhasınıñ jurnalisti. O, içtimaiy ve ekologik meselelerni aydınlattı, qırımlılarnıñ soravlarını çıqardı. 2021 senesi saban ayınıñ 10-nda işğal etilgen Qırımda Rusiye FSB tarafından Ukraina faydasına casuslıq yapqanında ve maşnasında "öz başına yapılğan patlayıcı alet" saqlağanında qabaatlanıp tutuldı.
Mustaqil advokatnıñ kirgeni Aqmescit "makemesi"niñ oturışında, o, Rusiye mahsus hızmetleri tarafından işkencege oğratılğanını bildirdi.
"Gratı" neşiriniñ baş muarriri Anton Naumlük ukrain jurnalisti Yesıpenkonıñ elektriknen işkencege oğratılğanını bildirdi.
2022 senesi kiçik aynıñ 16-nda işğalli Aqmescit rayon makemesi Yesıpenkoğa umumiy rejimli müstemekede altı yıl apis cezasını ve 110 biñ rublelik (39 600 ğrıvnâ) para cezasını berdi.
2022 senesi arman ayınıñ 18-nde Qırımnıñ işğalli Yuqarı makemesi apellâtsiya şikâyetinde serbest jurnalistniñ apis cezasını bir yılğa qısqarttı.
Şimdi Vladıslav Yesıpenko umumiy rejimli müstemlekede 5 yıllıq apis cezasını çeke.
Rusiyeniñ Ukrainağa istilâsı başlağan soñ, Qırımdaki Rusiye müstemlekesiniñ hadimleri, "patlayıcı alet saqlağanı ve taşığanı" içün qanunsız olaraq maküm etilgen jurnalist Vladıslav Yesıpenkonen alâqalarnı sıñırlaylar.
Bundan da ğayrı, Keriçniñ 2-nci apishanesinde tolu miqyaslı istilâ başlağan soñ Yesıpenkonıñ areket tarzı ve sözleri diqqatnen közetile. Aman-aman er afta apishaneniñ "memuriyeti" tarafından çağırıla ve advokat ve qorantasına bir şey aytmamağa tevsiye etile.
2024 senesi orta küz ayında halq mevusı Yaroslav Yurçışın bildirdi ki, Vladıslav Yesıpenkonı ekinci apis müddetine azırlamağa tırışalar.
O yıl orta küz ayınıñ soñunda siyasiy mabüsniñ apayı Katerına Yesıpenko, aqayı Vladıslavğa qarşı ahlâqiy basqı quvetleşkenini bildirdi. Sıñırcı, onıñ ruhiy alına tesir etken şaraitte buluna.
2024 senesi boş aynıñ soñunda Freedom Now uquq qorçayıcı teşkilâtı, Volodımır Yesıpenkonıñ davası boyunca sebepsiz apiske alınuv meseleleri boyunca Birleşken Milletlerniñ İşçi gruppasına muracaat etti. Vesiqada onıñ Qırımda zenaat vazifelerini eda etüvinen bağlı aqlarınıñ bozuluvı qayd etile.
Prezidentniñ Qırımdaki temsilciligi ukrayinalılarnı ve ecnebiylerni "Serbest Qırımğa mektüp" teşebbüsine qoşulmağa, Ğalına Dovğopolanı ve qanunsız sürette apiske alınğan diger Ukrayina vatandaşlarına qoltutuv sözlerini yazmağa, aktsiya aqqında dost ve zenaatdaşlarına aytmağa ve içtimaiy ağlarda malümat tarqatmağa çağıra.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
