İşğal etilgen Qırımda yüz biñlernen insan Ukrayinağa sadıq olıp qala ve onıñ azat etilmesini bekley. Yarımadanıñ işğalden qurtarıluvına eñ çoq qırımtatarlar, qavmiy ukrayinler ve diger milletlerniñ vekilleri ümüt besleyler.
"Qırım platforması" ihtisasiy ağınıñ IV. halqara forumında Qırımtatar Milliy Meclisiniñ reisi Refat Çubarov bunı bildirdi.
"Bizler işğal etilgen Qırımda yüz biñlernen insan Rusiye işğalinden azat etilmesini beklegenini köz ögüne almalımız. Bu insanlar Ukrayina devletine sadıq olıp qalalar. Añlaşılır ki, bu qırımtatarlar, qavmiy ukrayinliler, başqa milletlerniñ vekilleridir, olar çoq", — dep Meclis reisi ayttı.
Onıñ qayd etkenine köre, qıyın şaraitke baqmadan, Qırım sakinleri ukrayin ve dünya siyasetini diqqatnen közeteler.
"Olar bütün vaqialarnı, muzakerelerni, intervyularnı, Ukrayina devletiniñ yolbaşçıları ve dünya siyasetçileriniñ aytqanlarını közeteler. Ve bu yerde biz Qırımda yaşağan insanlarğa pek diqqatlı ve ürmetli olmaq kerekmiz", — dedi o.
Meclis reisi halqara ölçevine diqqat ayırdı.
"Halqara meydançıqlarda qabul etilgen qararlarnıñ aman-aman episi pek nizamlı, doğru, adaletlidir. Amma olar yerine ketirilmey ve istilâcı devletni bu qararğa uymağa mecbur etecek mehanizmler yoq, ve bu insanlarnı pek raatsızlay. Bu insanlar eminler ki, bizler böyle mehanizmlerni tapa bilemiz", — dep qayd etti o.
Çubarov, Rusiyeniñ cinayetleriniñ halqara seviyede tanılması müim olğanını qayd etti.
"Qırımda adalet printsipleri üzerinde turğan bütün insanlar, dünyanıñ yaqın keçmişte olğan cinayetlerni afu etmeycegini köreler, ve bu olarğa bugün Qırımda olğan cinayetler içün de aynı böyle olacağına ümüt bere", — dep Meclis reisi bildirdi.
Aynı zamanda Çubarov Rusiye imperatorlıq siyasetini takbih etüv ve toponimiyanıñ müstemlekeleştirilüv qanunınıñ amelge keçirilmesini tenqit etti.
"Tasvir etiñiz ki, Rusiye ve Şuralar İmperiyasınıñ aqibetlerini red etmemiz içün yapılğan qanun Qırımnen bağlı iç bir şekilde çalışmaz, ve insanlar bunı körerler. Aman-aman teñiştirimeli olğan 1400 addan tek 99-ı deñiştirilgen oldı", — dep qoştı o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
