Vaqtınca işğal etilgen Yaltada Rusiye mahkemesi yerli sakinni internette bergen izaatları içün eki yılğa mahküm etti. Onı "Rusiyege qarşı laflar" ve "aşırıcılıqqa açıq çağıruvlar"nen qabaatlaylar.
İşğalli Qırım prokurorlığı bunı bildirdi.
Olarnıñ malümatına köre, "ukrayin kanalları"nda "rusfobik" tefsirler yazğanı, "ruslar aqqında aşağılayıcı sözler aytqanı" ve "Ukrayina Silâlı quvetleriniñ askerleriniñ areketlerine qol tutqanı" içün 45 yaşındaki adamnı qabaatladılar.
"Yalta şeer mahkemesi qabaatlanğan şahısnı qabaatlı tanıp, onı müstemlekede eki yılğa ve eki yıl devamında saytlarnı idare etüv aqqından marum etilmesine üküm etti", — dep "prokurorlıq" bildirdi.
Dava Rusiye Ceza qanunnamesiniñ "İnternet qullanuvınen aşırıcı faaliyetke açıq çağıruvlar" maddesine istinaden açıldı. Amma üküm daa işke tüşürilmedi.
Hatırlatamız ki, adamnı bu sene ilk yaz ayında tutıp alğanlar. İşğalli Qırım akimiyeti Yalta sakinine qarşı, FSBniñ fikirince, "rusfobik çağıruvlar" bar olğan ukrayin kanallarında yapqan izaatları içün cinaiy dava açtı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
