İşğal etilgen Qırımda, müellifleri "çetel agentleri" olaraq tanılğan eserlerniñ açıq meydanlarda icra etilmesine sıñır qoymağa teklif eteler. Mütenasip teklif işğalli belediye organlarına yollanıldı.
Qırım Devlet şurasınıñ işğalli reisi Vladimir Konstantinov bunı bildirdi.
Onıñ aytqanına köre, bunıñ kibi tedbirler Rusiyege qarşı "yaramaz areketler yapqan diger devletler"niñ vatandaşlarınıñ yırlarına da tatbiq etilmek kerek, çünki olarnıñ lafları ve areketleri Rusiye içün "zararlı".
"Cumhuriyetniñ şeheri ya da rayonınıñ açıq meydançıqlarında çıqışta bulunmağa istegen soqaq artistlerine, repertuarında qayd etilgen kategoriyalarğa ait şahıslar tarafından yaratılğan eserler olsa, icadiy çıqışlarnıñ keçirilmesine razılıq bermemege tevsiye etile", — dep Konstantinov añlattı.
Berilgen malümatqa köre, eñ yaqın vaqıtta işbu meseleni işğalli Qırım belediye qurulışları şurasınıñ faaliyeti çerçivesinde baqmağa planlaştırıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
