İşğal etilgen Sevastopolğa (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adğa) ana-babasını ziyaret etmek içün ketti — esir alındı. İşğalli mahkeme Yevhen Melnıçuknı "casuslıq"ta qabaatlap, 17 yılğa apiske aldı. İşkencege oğratılıp, Rusiye müstemlekesine etap etilgenine baqmadan, onıñ apayı ve altı balası onıñ qaytmasını bekleyler.
Suspilne Qırım siyasiy mabüsniñ ömür arqadaşı ve zenaatdaşınen laf etip, onıñ ikâyesini tarif etti — Sevastopolda (Aqyarda) yaşayışından ve Menlik İnqilâbında iştirakinden başlap, apiske alınmasına ve işğalli mahkemeniñ ükümine qadar.
"Tolu miqyaslı istilâdan bir afta evel o, maña Qırımğa ana-babasına barmaq kerek olğanını ayta. Men oña: "Ebet, ket", — dep ayttım", — dep siyasiy mabüsniñ apayı İrına Melnıçuk hatırladı.
İşğal başlağan soñ, altı balası olğan qadın, İrpin ateşlerinden öz başına qurtulğan edi. Qoranta çetelge ketti.
"Tuvğan yerimizden qurtulıp, men yanımızğa kelmege rica etkende, o, yoq, men mında olmalım, dedi", — dep qadın añlattı.
Yevhen Sevastopolda (Aqyarda) doğdı, Nahimov adına arbiy-deñiz institutınıñ mezunı, yelken idman ustası, er vaqıt Ukrayina tarafdarı olğan iş adamı. Menlik İnqilâbı vaqtında o, dostlarına qol tutmaq içün Meydanğa ketti.
"O, maña üç künge ketecegini ayttı, tek anda qalacaq, dostlarına qoltutacaq. Soñra, kiçik ayğa qadar — bu kederli vaqialarğa qadar — anda qalğanı belli oldı", — dep İrına añlattı.
İrına dört balasınen Sevastopolda (Aqyarda) qaldı ve Rusiye işğali başlağanını hatırlay.
"Bu arbiy maşnalarnı, silâlı adamlarnı kördim. O vaqıt aqayıma telefon etkende, o, bir şey ola bilecegini, arbiy isyan başlana bilecegini ve balalarımnen Kıyivge ketsem yahşı olur, dep ayttı. O ise o vaqıt Sevastopolğa ketken edi", — dep İrına hatırladı.
Anda Yevhen, ruslar tarafından blok etilgen yerlerde ukrayin arbiy hızmetçilerine yardım ete edi.
"O, arbiy hızmetçilerge yardım ete, dostlarına sigar, aş ketire, olarnen subetleşe, Ukrayinadan vazgeçmege ve Rusiyege ant etmege rica etkende qoltuta edi", — dep qadın ayttı.
2014 senesi saban ayında Yevhen, Rusiye işğaline qarşı küreşmek çağıruvınen video muracaatlarını yazdı. Bundan soñ "Qırım öz-özüni mudafaa etüvi" onıñ evine kirdi.
"Onı pek qattı köteklediler. Daireni tinttiler, silânı qıdırdılar, qayda onı saqlağanıñnı soradılar. Soñra onı bir yerge alıp kettiler, o, qayda olğanını bilmey. "Onıñ banderacı olğanını ayta ediler", — dep apayı añlattı.
Daa soñra qorantası Qırımdan İrpinge köçti. Yevhen ekolog edi, şeher başı vazifesine namzet kösterdi, jurnalist olaraq çalıştı.
"Biz birden tek işdeşler degil, dost oldıq. Jenâ çoq alanı qorçaladı — Ğostomel şossesinden demiyolğa qadar. O, Ukrayina — suveren devlet olğanını er vaqıt qayd ete edi", — dep zenaatdaşı Yuliya Polânska tarif etti.
O, balalarını vatanperverliknen terbiyeley edi. Doğrusını aytqanda, kiçik qızımıznı ayırılmazdan evel o bebek olğanda kördi.
"Küçik qızımız babasını iç bir vaqıt tanımadı, onı tek bebek olğanda körgen edi. O, balalarnı daima Vatanğa ürmetnen ögrete edi", — dep İrına ayttı.
2022 senesi orta küz ayında Yevhennen bağ yoq oldı. Ana-babası oğlunı Rusiye quvetçileriniñ alıp ketkenini ögrendiler, bir qaç aydan soñ ise onı Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) SİZOda "casuslıq"ta qabaatladılar. Ve tek 2024 senesi baarde ana-babası oğlunı apishanede kördi.
"O, 17 ay devamında onı urğanlarını, işkencege oğratqanlarını, tahqiqat tedbirlerine razı olmağa mecbur etmek içün onı ormanğa alıp ketkenlerini ayttı. O, çoqtan berli razı olmağan edi", — dep İrına ayttı.
2024 senesi boş ayda işğalciler onı sert rejimli müstemlekede 17 yılğa mahküm ettiler. Onıñ bulunğan yeri belli degil, mahkümni endi bir aydan berli etap eteler.
"Onı pek qasevetlendiremiz, nasıl etip dayanacaq. O vaqıt bile büyrekleri ağrıp, ağır ruhiy alı edi. Bekleymiz, tezden qaytacağına ümüt etemiz. Er bir deñiştirüvni bekleymiz", — dep qadın ayttı.
İrına aqayını deñiştirüv cedveline kirsetmege tırıştı, ve Yevhenni azat etmek içün halqara teşkilâtlarğa muracaat etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
