Nyü-Yorktaki BMT ştab-dairesinde er yıl arman aynıñ 22-de qayd etilgen Din ya da işanç esasında zorbalıq qurbanlarını halqara hatırlav kününe bağışlanğan tedbir keçirildi. Anda Qırımtatar Resurs Merkeziniñ müdiri Zarema Bariyeva çıqış yaptı, anda işğal etilgen Qırımda diniy basqılar meselesini köterdi.
Bunı QRM bildire.
Halqara toplaşuvda Zarema Bariyeva, "Hizb ut-Tahrir" ve "Yegova şaatları" işinde taqip etilgen adamlarnıñ sayısı, işğalci akimiyeti tarafından Ukraina pravoslav kilisesine qarşı yapılğan repressiyalar, din erbaplarını cinaiy ve memuriy taqip etüv, yarımadanıñ musulman cemiyetlerine qoyulğan cöremeler, diniy mekteplerniñ lâğu etilmesi, Ukraina tamır halqlarınıñ diniy binaları yerlerinde qanunsız qurucılıq işleri alıp barılması.
"Qırımda siyasiy, etnik ya da diniy sebeplerden insan aqlarınıñ kütleviy bozuv vaqiaları, bizim teşkilâtımız (QRM) tarafından vesiqalaştırılğan, bizge biñlernen Ukraina vatandaşları bu repressiyalarnıñ qurbanı olğanını iddia etmege esas bere", — dedi Bariyeva.
Zarema Bariyeva qayd etti ki, aynı zamanda, "taqiplerniñ aqiqatları aqqında aqiqiy ve daa tolu tasvirni tek Qırım deokkupatsiyadan soñ alacağımız, meselâ, Buçada olğanı kibi".
"Yarımada işğal etilgen 11 yıl devamında advokatlar, uquq qoruyıcılar ve faalciler Qırımnıñ işğal akimiyetleri tarafından çeşit taqiplerge ve basqılarğa oğratıldılar. Eger öz müşterilerini qorçalamaq kerek olğan advokatlar uydurma sebeplernen mahkeme pancaları artında otursalar ve litsenziyalarından marum etilseler, işğal etilgen territoriyada nasıl aqlarnıñ qorçalanması ve ömürge keçirilmesi aqqında laf ete bilemiz", — dep qayd etti Bariyeva öz çıqışında.
Bundan da ğayrı, QRM müdiri "Atalık" ("Hristian babası") QRM halqara teşviqat tedbiri aqqında malümat berdi ve bu tedbirniñ ömürge keçirilmesine öz issesini qoşmağa teklif etti.
"Cezasızlıq er vaqıt qanunsızlıqqa ketire, işğal devam etse, biz tek Qırımda ruslar tarafından yapılğan insanlarnıñ diniy aq-uquqlarını ve serbestliklerini bozğan daa çoq cinayetlerni vesiqalaycaqmız. Biz bu cinayetlerni, em de insan aqları qorçalayıcılarına qarşı taqip ve ücümlerni toqtatmaq içün ğayretlerimizni birleştirmek kerekmiz. Qırım tek bir vilâyet degil, o, zemaneviy dünya nizamınıñ köstergiçidir. Ya onıñ bütünley yoq etilmesine yol berecekmiz, ya da kelecegimizni birlikte qoruycaqmız ve insan aq-uquqları ve din aq-uquqlarınıñ qorçalanuvını kefalet etecegimiz", – qayd etti Zarema Bariyeva.
Uquq qoruyıcısı, halqara cemiyetni bu işke qarışmağa çağırdı ve işğal astında olğan qırımlılarğa yardım ete bilecek bir sıra tevsiyelerni berdi: işğal etilgen Qırımda insan imayecileri ve faalcileri mecburiy ğayıp olğan vaqialarda BMT-nıñ tezce cevap mehanizmini işlep çıqmaq, Ukraina tamır halqlarınıñ vekillik organlarınıñ BMT İnsan aqları keneşiniñ işinde keniş iştirağını temin etmek, Rusiye Federatsiyası territoriyasındaki apishaneler ve müstemlekelerde bulunğan qırımlı siyasiy mabuslerni ziyaret etmek mehanizmini işlep çıqmaq, Qırım içün BMT-nıñ gumanitar cevap planını işlep çıqmaq.
Telegram, WhatsApp, Facebook ve YouTube-ta Suspilne Qırım haberlerine abune oluñız
