Ukraina Prezidenti Volodımır Zelenskiyniñ qararı ile areketke kirsetilgen sanktsiyalar cedvelinde işğal etilgen Qırımda faal iştirak etken eki ukrain iş adamı bar: Volodımır Vılegjanin ve Volodımır Kotelâk.
Bu aqta prezidentniñ saytında derc etilgen qararında bildirile.
2025 senesi oraq ayında Lviv vilâyetiniñ prokuraturası, Volodımır Kotelâkqa eki madde boyunca şübe aqqında haber etti: işbirlik faaliyeti ve konstitutsion tertipni zorbalıqnen deñiştirmek ya da yıqmaq ya da devlet akimiyetini elge keçirmek, Ukrainanıñ territoriyasını ya da devlet sıñırını deñiştirmek maqsadınen keçirilgen areketlerniñ maliyetleştirilmesi.
Tedqiqatqa köre, o, zapt etilgen Qırımdaki bir musafirhaneniñ ortaq saibi olıp, Rusiye ordusınıñ maliyetini temin ete. Bu adam, Rusiye Federatsiyasında bergi töley ve ötelni qaravullamaq içün Rosgvardiya askerlerini işke alğan.
"Hususan, cinayetçi, biznesni Rusiye Federatsiyası qanuncılığına köre yañıdan cedvelge aldı ve "federal bergi hızmetine" adlandırılğan şirketke bergiler töley. Bundan ğayrı, 2020 senesinden başlap onıñ Rosgvardiyanıñ Qırımda köçme mülkni qorçalav boyunca qurulış bölüginen añlaşması bar. Kollaborator bu hızmetler içün paranı doğrudan-doğru vaqtınca zapt etilgen yarımadada yerleşken Rusiye Federatsiyasınıñ işğalci gruppasınıñ bank esaplarına töley. Rusiye Federatsiyasınıñ bu küç qurulışı Ukrainağa qarşı silâlı tecavuzında doğrudan-doğru iştirak ete", — denile beyanatta.
Cinaiy işniñ bir qısmı olaraq, cevapkârnıñ mal-mülkü elge keçirildi, hususan:
- dört müessiseniñ aman-aman 6,5 million grn miqdarında korporativ aqlarnıñ aktsiyaları;
- bir qaç köçme mülk obyektleri;
- topraq arizaları;
- umumiy meydanlığı aman-aman 4 biñ m2 olğan mesken olmağan bina ve odalar.
2024 senesi Volodımır Vılegjaninge Çerkas prokuraturası tarafından konstitutsiya tertibini zorbalıqnen deñiştirmek ya da yıqmaq ya da devlet akimiyetini elge keçirmek, territoriyanıñ sıñırlarını ya da Ukraina devlet sıñırını deñiştirmek maqsadınen yapılğan areketlerni maliyetleştirüvde şübelengeni aqqında haber berildi.
Bundan da ğayrı, 2023 senesi ADB Çerkası vilâyetinde "Klişçin konserva zavodı" şirketiniñ tesisçisini tecavuzcı devletke yardım teşkil etmekte faş etti, dep haber etti.
Devlet siciline köre, işhaneniñ saibi Volodımır Vılegjanindir.
"Yarımadanıñ işğalinden soñ qırımlı iş adamı Kiyevge köçip kelgeni belli oldı. O, öz şirketlerini Ukrainanıñ idare etilgen ve vaqtınca idare etilmegen territoriyasında, sırasınen, Ukraina ve Rusiye yurisdiktsiyalarında yañıdan cedvelge aldı". Bu ise iş adamına vaqtınca işğal etilgen territoriyada iş alıp barmağa, aynı vaqıtta tecavuzcı devletniñ çeşit seviyeleri bücetlerine bergi ve gonorarlar tölemege imkân berdi. Ukraina cedvelge alınması sebebinden iş adamı Avropa Birligine köy hocalığı mahsulatlarını yetkizmek içün qanunsız mehanizmni teşkil etti. İddia etile ki, o, Rusiye ve Belarus yardımınen Poloniyağa ukrain mallarını çıqara ve bunıñnen Qırımda istisal etilgen mallarnıñ importını yasaq etmek boyunca AB sanktsiyalarından aylanıp keçe", — qayd etile haberde.
O, em de işğal etilgen Qırımda yerleşken bir sıra şirketlerge saiptir, olarnıñ arasında "Krımtorgservis" OOO, "PZ Krımskiy" OOO, "Avis-agro Sivaş" OOO ve digerleri bar, dep yaza "Censor.net". Bundan ğayrı, "Slidstvo.İnfo"-nıñ malümatına köre, o "Ay-Todor-Yug" öteliniñ ortaq saibidir.
"Uquq qorçalav organlarınıñ hadimleri Volodımır Vılegjaninniñ köy hocalığı mahsulatlarını shemalar yardımınen satqanını taptılar. O, "Osaviahım" şirketi çıqarğan mahsulatlarnı idare etilgen "Vital" şirketine berdi, o ise öz mahsulatlarını endi Vılegjaninniñ idaresi astındaki Poloniya şirketlerine sata edi. Böyleliknen, o, işğal etilgen Qırımda çıqarılğan mahsulatlarnı Avropağa satmaq yasağını aylanıp keçti", – dep yaza "Slidstvo.İnfo".
Hatırlatamız, arman aynıñ 23 künü Ukraina Prezidenti Volodımır Zelenskiy, Rusiyege qarşı yañı sanktsiyalar kirsetilgenini ilân etti. Rusiye cenkinde çalışqan 139 şahısqa ve uquqiy şahısqa qarşı ve Rusiyeni maliyetleştirgen çeşit memleketlerniñ 28 vatandaşına qarşı sanktsiyalar kirsetildi.
Telegram, WhatsApp, Facebook ve YouTube-ta Suspilne Qırım haberlerine abune oluñız
