Ukraina, Rusiye ile ola bilir muzakerelerge azırlana, lâkin Qırım meselesi bellisiz qalmaqta.
Siyasetşınas İğor Reyteroviç, Meclis reisi Refat Çubarov, prezident Volodımır Zelenskiy ve AQŞ prezidenti Donald Tramp işğal etilgen yarımada aqqında öz mevamlarını, onıñ cenkteki rolüni ve eger onı berseler, neticelerini bildirdiler.
"Ukraina içün pek yaramay bir stsenariyni ömürge keçirmege areket ola bile, o vaqıt Rusiye daa Qırım meselesini cenkniñ soñuna ait olacaq muzakerelerge ketirmege areket etecek. Biz zapt etüvinden berli imaye etilgen mevamımıznı qorçalamaq kerekmiz, bu Ukrainanıñ territoriyası, o vaqtınca işğal etilgen, Ukraina onı siyasiy ve diplomatik vastalarnen qaytaracaq", — dep qayd ete siyasetşınas İğor Reyteroviç.
Ukraina oğrunda Qırımdan vazgeçmek kelecekte havfsızlıqqa diqqatsızlıq demek olacaq – emin qırımtatar halqnıñ Meclisi reisi Refat Çubarov.
"Men ukrain cemiyetinde çeşit fikirler olacağını red etmeyim. Bazıları: "Böyle olsun, Qırımnı bereyik, amma biz mustaqil Ukrain devletini saqlap qalırmız", – deycekler. Amma aynı vaqıtta bu adamlar mustaqil Ukraina devletini saqlap qalmaq mümkün olurmı, eger Qırımdan vazgeçsek. Bu devletniñ iqtisadiy havfsızlığı nasıl teminlenecek? Ve arbiy havfsızlıq? Eger Qırım teslim olsa, o vaqıt Rusiye bütün saasını idare etecek, onıñ sayesinde Ukrainanıñ çoq iqtisadiy bağları yer ala, mudafaa teminlene", — dey Çubarov.
AQŞ prezidenti Donald Tramp arman aynıñ 18-de Vaşingtonda Ukraina prezidenti Zelenskiy ve Avropa memleketleriniñ liderlerinen körüşüvniñ neticelerini tefsir etip, Fox News telekanalında 2014 senesi Rusiyenen cenkniñ başlanuvınıñ tamır sebeplerini talil etti ve Putin Qırımnı almaq ve Ukrainanıñ NATO-ğa kirmesine mania olmaq istegenini qayd etti. Aynı vaqıtta AQŞ-nıñ şimdiki yolbaşçısı o vaqıttaki Amerika yolbaşçısı Barak Obamanı yarımadanı işğal etmekte qabaatladı.
"Cenk asılında NATO ve Qırım sebebinden başlandı — olar (ruslar — tarir) Qırımnı qaytarmaq istediler. Bu, Obama tarafından bir ateş atılmayıp yapıldı, belki de, men körgen eñ yaramay köçme mülk añlaşmasınıñ bir qısmı olaraq. Demek, olar (ukrainler — tarir) öz mülküniñ çoq qısmını deñiz yanındakilerge berdiler. O nasıl çalıştı? Pek yahşı degil. Ve Qırım – Ukrainanıñ incisi, onı Obama bağışladı. O, ondan vazgeçüvlerini talap etti. Rusiye kelip onı baladan qanfet kibi alıp ketti. Ve bu, kerçekten de, Obamanıñ qabaatı edi", — dedi Tramp.
Arman aynıñ 21-de jurnalistlernen körüşüvde Volodımır Zelenskiy, Qırımnıñ işğali Rusiye Federatsiyasına yarımadanı askerleştirmege ve onı 2022 senesi büyük miqyaslı ücüm içün tramplin yapmağa imkân bergenini ayttı. Şunıñ içün de Rusiye Federatsiyasına sanktsiyalar basımı birinci nevbettedir.
"Men Putin Qırımnı askerleştirdi, onı tramplin olaraq cenübiy areketke azırladı, dedim. Mesele şunda ki, Qırım ruslar tarafından işğal etilgende, kimse – ne AQŞ-ta, ne de dünyada – Rusiye Federatsiyasına qarşı aqiqiy tesir etecek qattı sanktsiyalar kirsetmedi, dedim. Şunıñ içün aqiqiy basım ve aqiqiy havfsızlıq kefaletleri pek müimdir", — dedi Ukraina Prezidenti.
Ukraina prezidenti ve Kreml başı arasında ola bilir körüşüv Putinniñ cenkniñ soñu ile bağlı aqiqiy niyetlerini kösterir, dey Prezident apparatınıñ başınıñ mesleatçısı Oleksandr Bevz.
"Rusiye çoq laf ete, amma ameliy adımlar atılmadı. Bu körüşüv, o pek tasviriy olacaq. Prezident Tramp, sırasınen, bunı da Putinniñ aqiqiy tınçlıqqa azır olğanını ya da olmağanını kösterüv olaraq qabul ete mi?" — dep añlattı Bevz.
Aynı zamanda yaqın vaqıtta Ukraina Prezidenti ve Kreml başı arasında körüşüv olacağı sual doğura. Keçken künlerde Putinniñ yardımcısı Yuriy Uşakov, Rusiye tek Ukrainanen eki taraflama muzakerelerde delegatsiya başlıqlarınıñ seviyesini kötermege azır olğanını ayttı.
Telegram, WhatsApp, Facebook ve YouTube-ta Suspilne Qırım haberlerine abune oluñız
