Arman aynıñ 23-de Ukrainada Ukraina milliy bayrağı künü qayd etile. İşğal astında yaşağan er bir adamğa basqıncığa irade, serbestlik ve qarşılıq kösterüvni hatırlatqan timsal.
Suspilne Qırım, adı açıqlanması şartınen Ukraina milliy bayrağı künü qırımlılardan işğal astında yaşamaq olar içün ne demek olğanını soradı.
Viran etilgen yaşayış ve aile içün acısı
"İşğalde yaşamaq – ağırlıqtır. Yoq etilgen ömür ve qoranta içün acısı. Şimdiki vaziyetke tesir etip olamağanıñız içün ağrı. Tuvğan eviñiz, keçmişte qalğan şeyler ve hatırlavlar içün acısı. İşğalde yaşamaq – bu qorqu. Özüñiz ve sevimlileriñiz içün qorqu. Yaşayış, endi iç bir vaqıt olğanı kibi olamaycağına qorqu. İşğal astındaki yaşayış – açuvdır. Bu duyğu iç bir vaqıt ketmey, amma tirenüv, küreş ve ümütniñ içki küçüne çevirile."
Serbestlikni unutmaq
"Adiy kündelik müitte qorqu duymamağa alışqan insanğa, qonuşuv vaqtında ne aytıla bilecegi ve ne aytılmaycağı aqqında qayğırmamaq, siyasiy ceryanlar aqqında öz fikirlerini serbest bildirmek, öz aqlarını qorçalamaq içün zümrege toplanmaq pek qıyın olacaq, çünki bütün bu alışqanlıqlarnı unutmaq kerek olacaq. Bu yerde Qırımğa "minnetsiz" qırımlarğa Rusiyeni nasıl sevmege ögretmek içün kelgen daima mırıldağan, dostsız, çoq vaqıt atta açuvlı "yañı sakinlerni" qoşıñız. Bu yerde vatandaşlarnıñ zeinine suniy şekilde yerleştirilgen terror telükesinden keniş tarqalğan qorqunı qoşıñız. Bu ise ancaq küçük bir tamçı..."
O, daima olmaycağına ümütnen yaşamaq
"Bu siz ya da sevimlileriñiz siziñ fikirleriñiz içün siziñ artıñızdan kelecekler degen qorqudır. Bu içki köçüv ve "yañı qaidelerge" köre cemaat ömürinden bütünley tışlanuvdır. Bu ebediy degil ve eger siz olmasañız, o vaqıt iç olmağanda siziñ balalarıñız ve torunlarıñız serbest bir memlekette serbest yaşaycaqlarına ümüttir."
Kelecekke planlarsız yaşamaq
"O, bir qaç yıl devamında bir aftadan ziyade bir şey planlaştırmağan vaqıttır... Çünki kelecek belli degil".
Ukrain Qırımı aqqında hatıralarnı saqlamaq
"Bu menim balalığımnıñ soqaqlarındaki ruslar, bu qartbabañnı soñki kere quçaqlağanıñnı bilmek, bu amanlıq ve ev duyğusını coymaq, bu sevimlilernen körüşmege ümüt etmek, teşviqatqa boğulmamağa tırışmaq, bu Ukrain Qırımınıñ hatırlavlarını saqlap qalmaqtır".
Qırımtatar Merkeziniñ malümatına köre, Rusiye apishanelerinde Qırımdan eñ azdan 277 siyasiy mabus bulunmaqta — olardan 157-si qırımtatarlar. Episi olıp, işğal devrinde eñ azdan 431 siyasiy taqip adisesi qayd etildi. Soñki bir yıl içinde 100-den ziyade vaqia olıp keçti.
Telegram, WhatsApp, Facebook ve YouTube-ta Suspilne Qırım haberlerine abune oluñız
