12 yılğa qanunsız şekilde mahküm etilgen Eskender Abdulganiyev yarım yılğa Kemerovdaki 29-ncı müstemlekede tek kamera türlü odağa (TKTO) yerleştirildi.
Adamnı ziyaret etken advokat "Qırım birdemligi"ne bunı bildirdi.
"İmayeciniñ malümatına köre, Abdulganiyev mayısnıñ ortasında Yurğadaki TM-41den Kemerovdaki TM-29ğa avuştırıldı. Bunıñ sebebi, 41-nci müstemlekede qırımtatarnı "sistematik bozuvları içün" yerleştirecek tek kamera türlü oda kibi bir yer olmağanı oldı", — dep haberde qayd etildi.
Abdulganiyevniñ etapı aqqında oraq ayınıñ soñunda belli oldı. Onıñ anası o vaqıt "Qırım birdemligi"ne aytqanı kibi, onıñ oğlu yuvunıp namaz qılmaq içün soyunğanını nezaretçiler "işançsızlıq saydı".
"Qırımtatarnı ziyaret etken advokatnıñ bildirgenine köre, TM-29ğa yollanılmadan evel adam kerçekten de ŞİZOda bulunğan edi. O, eki kere 15 künlik cezağa tayin etildi. Abdulganiyevniñ aytqanına köre, cezalar "güzel közler içün" tayin etildi. O, TKTOa yollanılması aqqında qarar berilmezden evel çağırılmadı", — dep haberde qayd etildi.
TM-29ğa etap etilgen soñ, onı 30 künge SŞZOğa yolladılar, soñra ise TKTOa avuştırdılar. Advokatnıñ aytqanına köre, Abdulganiyevniñ apis müddeti 2026 senesi qara qış ayınıñ ortasında bitecek.
Mahküm etilgenlerni rejimli odağa yerleştirüv — "ceza tedbiri", ilk evelâ "tış dünyadan izolâtsiya etüv" maqsadınen yapılğan, dep uquqçı Lilâ Gemeci ayttı.
"Yalñız qalmaq, sıñırlı yollamalar, körüşüvler ve telefonlar yoq. Bu vaziyet [TKTOa yerleştirilüv] Abdulganiyevge basqı yapmaq niyetini köstere", — dep ayttı o.
"Qırım birdemligi"niñ yazğanına köre, mahküm etilgen adam etapqa yalıñız ketken edi. Şimdi o, izolâtorda tutula, nezaretçiler onı bir kişilik yürüşke alıp keteler. Abdulganiyevniñ aytqanına köre, o mektüplerni er vaqıt ala, mektüpleri de muntazam sürette yollanıla.
Eskender Abdulganiyev aqqında ne bilemiz
2020 senesi boş aynıñ 3-de Rostov-na-Donu şeeriniñ Cenübiy rayon arbiy mahkemesi, Rustem Emirüseinovnı 17 yıl, Eskender Abdulganyevni 12 yılğa, Arsen Abhayrovnı ise 13 yılğa mahküm etti. Birinci üç yılğa apiske aluvnıñ eñ qattı şartları tayinlendi.
2021 senesi boş aynıñ 1 künü Arbiy istinaf mahkemesi, Cenübiy rayon arbiy mahkemesiniñ qararını tasdıqladı. Yapılğanlarnıñ episi, Rusiyede terrorist olaraq tanılğan, amma dünyanıñ bir çoq memleketlerinde, şu cümleden Ukrainada sıñırsız areket yapqan "Hizb ut-Tahrir" islâm siyasiy fırqasına qoşulğanlarında qabaatlandılar.
Abdulganiyev, üç yıldan ziyade apishanede bulunsa da, Rusiye mahkemesiniñ qararına köre, siyasiy mabüs, üç yıl apishanede tutulmaq kerek edi, soñra ise müstemlekege avuştırılacaq edi.
"Hizb ut-Tahrir işinde" Krasnogvardeysk gruppasınıñ iştirakçıları Arsen Abhairov, Rustem Emirüseinov ve Eskender Abdulganiyev mahkeme tarafından belgilengen müddetten ziyade tutuvnıñ eñ qattı şartlarınen apishanede tutulalar. Deyerlik bir yıl evelsi olarnı qattı nizamlı müstemlekesine avuştırmaq kerek edi.
2024 senesi saban ayında Rusiyeniñ müstemlekesinde Volodımır Abdulganiyev, Rusiye vatandaşlığını qabul etmege mecbur oldı. O red etti, bundan soñ onı apishaneniñ tamir binasına avuştırdılar.
2024 senesi oraq ayında Abdulganiyev, Kemerovo vilâyetindeki 41-nci tüzetiş müstemlekesinden Kemerovo şeerindeki 29-ncı müstemlekesine avuştırıldı.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
