"ATEŞ" arbiy-partizan areketiniñ agentleri işğal etilgen Herson vilâyetiniñ sol yalısında işğalli akimiyet vekilleriniñ areketlerini taqip ettiler. Hususan, "memuriyet" hadimleri ve "mebuslar" qorantalarınen Gola Prıstan, Kahovka, Nova Kahovka, Ğornostayivkadan Qırımğa çıqqanlarını qayd ettiler.
"ATEŞ" areketi Telegramda bunı bildirdi.
"Herson vilâyetiniñ işğal etilgen qısmından duşnmannen işdeşlik yapqanlar sol yalıdan qaçalar. "ATEŞ"niñ agentleri bildireler ki, işğal memuriyetleriniñ hadimleri ve Gola Prıstan, Kahovka, Nova Kahovka, Ğornostayivkadan "mebusları" Qırımğa ketmege başladılar, qorantalarını faal sürette alıp keteler. Rusiyenen işbirlik tutqan insanlarğa muracaat etemiz, tüzeltüv yoluna çıqmaq şansıñız bar — biznen bağlanıñız", — dep areket vekilleri bildirdiler.
Hatırlatamız ki, arman ayınıñ 21-nde Ukrayina Silâlı quvetleriniñ mahsus operatsiyaları Qırımnı qıtaiy Ukrayinanen bağlağan Canköy demiryolu yanında mahsus operatsiya keçirdiler — mahsus askerler ruslarnıñ yaqarlıq ve yağ malzemelerinen yüklengen trenine ücüm ettiler. Arbiy hızmetçilerniñ malümatına köre, mahsus tedbirler neticesinde Rusiye ordusınıñ cenübiy taqımını temin etmek qıyınlaştı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
