Mahsus operatsiyalar quvetleri, gece işğal etilgen Qırımnıñ Canköy rayonındaki demiryol astyapısına ücüm etilgenini tasdıqladılar. Arbiy hızmetçilerniñ malümatına köre, Rusiye ordusınıñ areketli terkibine yaqarlıq-yağ malzemelerine ücüm etildi.
Telgramda Mahsus operatsiyalar quvetleri bu aqqında haber ettiler.
"Ukrayina Silâlı quvetleriniñ mahsus operatsiyaları quvetleri Canköy demiryol stantsiyası yanında mahsus tedbirlerni keçirdiler. Ameliyat arman ayınıñ 21-ne keçer gecesi yapıldı. Mahsus hızmetçiler ruslarnıñ yaqarlıq ve yağnen maşnalarına urdılar. Mahsus tedbirler neticesinde Rusiye ordusınıñ cenübiy gruppirovkasınıñ teminatı qıyınlaştı", — dep MOQ bildirdi.
Yerli sakinler Suspilne Qırımğa arman ayını~ 21-nde Canköyde yüz bergen patlamalar aqqında malümat tasdıqladılar.
"Ücüm o qadar küçlü edi ki, pencereler aman-aman yıqıldı", — dep Canköyde yaşağan bir qadın ayttı.
Rusiye Mudafaa nazirligi, arman ayınıñ 21-nde saba saat 7-den 10-ğa qadar Qırım, Qara ve Azaq deñizleri üzerinde 21 uçucısız uçaq aleti yoq etilgenini bildirdi.
"Saat 7-den 10-ğa qadar AMSnıñ qaravul vastaları 21 ukrayin uçucısız uçaq aletini alıp ve yoq etti: 16 UUA — Qırım Cumhuriyetiniñ üzerinde, 4 UUA — Azaq deñiziniñ üzerinde, 1 UUA — Qara deñizniñ üzerinde", — dep haberde qayd etildi.
Hatırlatamız ki, bu gece işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) patlamalar duyuldı, yanğın oldı. İşğalli akimiyet bu talimler olğanını bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
