"Qırım öz-özüni mudafaa etüvi"niñ sabıq reisi ve mebus 15 yılğa maküm etilir

Mahkemege "Qırım öz-özüni mudafaa etüvi" qanunsız silâlı birleşmesiniñ "üçünci bölügi"niñ sabıq yolbaşçısı, şimdi ise işğalli "Qırım devlet şurası"nıñ şimdiki mebusına qarşı qabaatlav aktı yollanıldı. Oña 15 yılğa qadar üküm etile bilir. 2014 senesi işğalcilerge qanunsız referendumnı keçirmege yardım etti.

Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığı bunı bildirdi.

"Onıñ areketleri qanunda qayd etilmegen silâlı birleşmelerniñ faaliyetinde iştirak etüv, müessiselerge, teşkilâtlarğa ücüm (Ukrayina Ceza qanunnamesiniñ 260-ıncı maddesiniñ 4-ünci qısmı), Ukrayina topraq bütünligi ve toqunılmazlığına basqı (Ukrayina Ceza qanunnamesiniñ 110-ıncı maddesiniñ 2-nci qısmı), devlet hainligi (Ukrayina Ceza qanunnamesiniñ 111-inci maddesiniñ 1-inci qısmı) ve işbirlik faaliyeti (Ukrayina Ceza qanunnamesiniñ 111-1-inci maddesiniñ 5, 6-cı qısmı) olaraq tasnif etildi", — dep haberde qayd etildi.

Tahqiqat, 2014 senesi kiçik ayda Ukrayina vatandaşı, sabıq arbiy hızmetçi olıp, "Qırım öz-özüni mudafaa etüvi" milliy arbiy birleşmesiniñ "3 bölügine kirgen sabıq enternasyonalist askerlerden, arbiy areketlerniñ, Şimaliy Kavkazdaki diger lokal zıddiyetlerniñ iştirakçilerinden teşkil etilgen cemaat tertibini qoruv bölügini" yolbaşçılıq etkenini belgiledi.

"Qabaatlanğan, "yarımadanıñ statusı aqqında referendum" keçirilmesi içün rey berüv keçirilgen Qırım MC Yuqarı Şurasınıñ binasını zapt etüv boyunca "quvetçiler"niñ faaliyetini idare etti. Bundan soñ, o, qoruv ve qanunsız "referendum"nıñ keçirilmesini temin ete edi", — dep QMC prokurorlığı bildirdi.

Tahqiqatçılarnıñ malümatına köre, aynı böyle alda qabaatlanğan adam "Qırım Cumhuriyetiniñ I ve II çağıruvnıñ Devlet Şurası mebusı" mandatını aldı, 2024 senesi ise — öz isteginen "III çağıruv mebusı" olaraq saylandı.

"Bundan ğayrı, 2024 senesi o, "Krım24" teşviqat telekanalına izaat berip, Rusiye Federatsiyasınıñ silâlı istilâsını aqladı, Ukrayinanı "terror teşkilâtı"nen qıyasladı, em de 2014 senesi kiçik aydaki vaqialarnı Qırım sakinleriniñ menfaatlarını "radikal" ukrayin cemiyetinden "qaraman qorçalavı" olaraq hatırladı", — dep prokurorlıq bildirdi.

Qayd etilgen areketler içün qabaatlanğan adam 15 yılğa mahküm etile bilir.

Читати ще