Baş istihbarat idaresi, vaqtınca işğal etilgen topraqlardan, şu cümleden Qırımdan, Rusiye neftini, aşayt mahsulatını ve kömürni alıp ketken RFnıñ gizli flotunıñ 42 gemisi aqqında malümat derc etti.
Bİİ War&Sanctions portalında bu aqqında haber etti.
Olarnıñ arasında sanktsiyalarğa oğrağan ''Lukoil'' şirketiniñ Kaspiy deñizinde "göñül flotu"nıñ tankerlerine neft avuştırmaq içün qullanğan suv üzerindeki anbarı da bar. Em de işğal etilgen Qırım limanlarına kelgen Aura IMO 9624316 gemisi.
"G7 ve AB neft embargosı, Rusiye nefti ve neft mahsulatlarına price cap siyaseti vaqtında tanker, Rusiye nefti ve neft mahsulatlarınıñ ihracatında iştirak ete. Gemi Ukrayinanıñ VİET Qırım limanlarına kirüv tedbirlerini keçire", — dep portalda qayd etildi.
Halqara deñiz teşkilâtınıñ (IMO) malümatına köre, dünyada 300-den çoq gemi sahte bayraqlar ve sahte vesiqalarnen yüre.
"Sanktsiyalar ve diplomatik basqı sebebinden, sanktsiyalarnı bozğan gemilerniñ bayraqlarını lâğu etken ya da olarnı qayd etmege red etken devletlerniñ sayısı arta. Cevap olaraq, Rusiye sahte shemalarnı qullana: sahte bayraqlarnı qullana, sahte saytlarnen sahte deñiz cedvellerini yarata, qayd vesiqalarını saht ete", — dep Bİİ bildirdi.
Umumen, War&Sanctions portalında 600-den çoq gizli flotunıñ gemisi aqqında malümat bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
