İlk malümatlarğa köre, AQŞ prezidenti Donald Trump ve Rusiye diktatorı Vladimir Putin arman ayınıñ 15-nde Alaska körüşüvinde topraq almaşuv meselelerini, şu cümleden Qırımnıñ statusını kötere bileler. Qırımtatar Milliy Meclisi, yarımadağa dair Ukrayina ve Qırımnıñ tamır halqınıñ iştiraki olmadan qabul etilgen er angi qararlarğa qarşı çıqqanını bildirdi.
Meclisniñ beyanatı armannıñ 13-nde resmiy saytında derc etildi.
Anda Qırımnı Rusiye toprağı olaraq tanımaq ıntıluvlarınıñ — de-fakto ya da de-yure — kimniñ teşebbüsinen yapılğanına baqmadan, "kesen-kes qabul etilmezligi" qayd etildi.
"Ukrayina devleti ve tamır qırımtatar halqınıñ iştiraki olmadan Qırımnıñ taqdiri aqqında bir qarar qabul etmege kimseniñ aqqı yoq", — dep Meclis reisi Refat Çubarov bildirdi ve bu qanunsız olğanını qoştı.
O, Qırımnıñ kelecegini tek Ukrayina topraq bütünliginiñ ğayrıdan tiklenüvi ve qırımtatar halqınıñ Ukrayina devleti çerçivesinde öz muqadderatını tayin etüv aqqınıñ yerine ketirilüvi kontekstinde baqmaq kerek, dep bildirdi.
Meclis Reisi ayrıca, Ukrayina ve qırımtatar halqınıñ iştiraki olmadan Qırım boyunca kuluar añlaşmalar Ukrayina suvereniteti ve tamır halqınıñ aqlarınıñ bozuluvı olaraq tanılacaq, dep tenbiyeley.
"Qırımtatar Milliy Meclisiniñ Reisi Rusiye-Ukrayina cenki ile bağlı halqara muzakerelerniñ iştirakçilerini istilâcı devletniñ areketlerini toqtatmağa ve Rusiyeni BMTnıñ Nizamnamesinde belgilengen halqara uquq qaideleri ve riayet etmege mecbur etecek mehanizmlerni qullanmağa çağıra", — dep aytıla beyanatta.
Trump ve Putinniñ Alâska körüşüvi aqqında ne bilemiz
Armannıñ 8-nde AQŞ prezidenti Donald Trump, Putin ile körüşüvi 2025 senesi armanıñ 15-nde Alâskada olacaq, dep ilân etti.
Bundan evel, Azerbaycan ve Ermenistan arasında beyanname imzalanğanda, Tramp, Ukrayinadaki cenkniñ bitirilmesi aqqında añlaşmada topraqlarnıñ deñişüvi baqıla, dep ayttı. Trumpnıñ aytqanına köre, bu eki taraf içün de faydalı olğan topraq berüvleri.
Ukrayina prezidenti Volodımır Zelenskıy, adaletli barışıq oğrunda AQŞnıñ prezidenti Donald Trump ve halqara ortaqlarınen beraber çalışmağa azır olğanını bildirdi, amma Rusiyeniñ topraq teslimatlarını red etti.
AQŞnıñ prezidentiniñ memuriyeti, Donald Trump Zelenskıy ve Putinniñ iştirakinen üç taraflı sammitniñ Alâskada keçirilmesine açıq olğanını bildirdi.
Daa evel Almaniya kantsleri Merts, Zelenskıynıñ armannıñ 15-nde Alâskada olacaq Trump ve Putin körüşüvine qoşulacağına ümüt etkenini bildirdi.
CNN, Beyaz evniñ temsilcilerine atfı etip, AQŞve Rusiye liderleriniñ körüşüvi Elmendorf-Riçardson arbiy bazasında keçirilecek, dep yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñı
