Ukrayinada mahkeme işğalli Qırım parlamentiniñ "mebusı"nı 11 yılğa azatlıqtan marum etüv cezasına mahküm etti. 2018 senesi Ukrayina prezidentiniñ fermanına köre oña qarşı şahsiy sanktsiyalar kirsetildi.
Arman ayınıñ 12-de Ukrayina Baş prokurorınıñ ofisi bunı bildirdi.
Uquq qorçalayıcılarnıñ malümatına köre, mahküm etilgen "halq diplomatiyası ve milletlerara munasebetler eyyeti"niñ yolbaşçısı olğan "Yedinaya Rossiya" firqasınıñ vekili ola. Tolu miqyaslı istilâ başlağan soñ, o, Qırım sakinlerini Ukrayinağa qarşı istilâğa qol tutmağa çağıruvnen Rusiye teşviqatını faal tarqatqan edi.
UBPOniñ bildirgenine köre, 2022 senesi o, Rusiyege qoltutqan "Millet" telekanalına bir sıra intervyu berdi, mında Qırım işğaline, onı "faşizmden qurtuluv" ve "Ğarp tesiri" dep, qoltuttı, em de işğal etilgen topraqlarnı saqlamaq ve Ukrainağa ücüm etmek içün RF silâlı quvetlerini qullanmağa çağırdı.
Erkek aşağıdaki maddelerge binaen qabaatlana:
- Akimiyetni zorbalıqnen devirmek çağıruvları (UCQniñ 109-ncı maddesi);
- Duşmannen işdeşlik (UCQniñ 111-1-nci maddesi);
- Rusiye Federatsiyasınıñ silâlı tecavuzınıñ aqlanuvı (UCQniñ 436-2-nci maddesi).
Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
