Ukrainanıñ Türkiyedeki elçisi Nariman Celal, Türkiyede bulunğan qırımtatar cemiyetiniñ vekillerine tış memleketlerde yaşağan ukrainli olğanı aqqında şaatlıqnı taqdim etti.
Bu aqta elçi Facebook-ta bildirdi.
"Bu tek vesiqa degil. Bu tanıluv. O, siz ukrain cemiyetiniñ ayırılmaz bir qısmı olğanıñıznı tasdıqlavdır. Siziñ seçimiñiznen siz Ukraina ve Türkiye arasında, keçmiş ve kelecek arasında, hatıramızdaki Qırım ve biz mıtlaq qaytacaq Qırım arasında köpüri olasız", – qayd etti elçi.
Türkiye qırımtatarlarınıñ özara yardım ve medeniyet umumiy merkeziniñ reis vazifesini becergen Namik Bayar, sertifikatlarnıñ taqdim etilmesi öz tamırlarını saqlamaq ve özüni tanıtmaq müimligini hatırlatqan teren bir alâmet olğanını ayttı.
Hatırlatmaq kerek ki, "Çet memleketlerdeki ukrainler aqqında" qanunğa köre, tış memleketlerdeki ukrain – bu başqa devletniñ vatandaşlığı ya da vatandaşlığı olmağan, em de ukrain etnik asıllı ya da ukrain asıllı olğan şahstır.
Çet memleketlerdeki ukrainniñ şaatlığı tış memleketlerdeki ukrainler milliy komissiyası, insanğa bu statusnı bermek aqqında qarar qabul ettikten soñ berile. Bu şaatlıq vesiqadır, amma pasportnıñ yerini almay.
Telegram, WhatsApp, Facebook ve YouTube-ta Suspilne Qırım haberlerine abune oluñız
