Arman ayınıñ 7-nde gece saat 2-de işğalciler Qırım köprüniñ areketini toqtattılar, onı saba saat 8-ge yaqın açtılar. RF Mudafaa nazirligi Qırım üzerinde dronlarnıñ tüşürilgenini bildirdi. Keriç köprü ögünde saat 8:00-de 2300-den çoq maşna tura.
Köpürdeki vaziyet aqqında operativ malümat Telegram kanalı bunı bildirdi.
"Taman tarafından elnen baqılması içün nevbette 1470 naqliyat vastası tura. Bekleme müddeti tahminen dört saat. Keriç tarafından 850 naqliyat vastası baqılmaq içün nevbette tura. Bekleme müddeti üç saatke yaqın", — dep 2025 senesi arman ayınıñ 7-nde saba saat 8-de bildirildi.
Saat 8:22-de Qırım köpründe areket kene toqtatılğanı haber berildi. İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) ava telükesi ilân etildi, dep şeer "gubernatorı" Razvojayev bildirdi. Sevastopolda (Aqyarda) deñiz yolcu ve quru naqliyatınıñ areketi toqtatıldı. Saat 9:12-de Sevastopolda (Aqyarda) ava telükesi lâğu etildi.
Qırımğa eki tren Kubanda dron parçaları tüşkeni sebebinden toqtaldı. RF Şimaliy-Kavkaz demiryolunıñ matbuat hızmetiniñ haber etkenine köre, kontakt ağında elektrik yoq oldı. Keçikme müddeti üç saatke qadar.
RF Mudafaa nazirligi uçucısız uçaq aletleriniñ ücüm etkenini bildirdi. Onıñ malümatına köre, "11 UUA Qırım üzerinde, 31 — Azaq deñizi ve 8 — Qara deñiz üzerinde urulğan edi".
Ukrayina tarafı UUAniñ ücümi aqqında malümatnı izaatlamadı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
