İşğalli Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) memuriyetiniñ reisiniñ muavini 6 yıllıq apis cezasına mahküm etildi. Mahkeme, Ukrayina vatandaşı Qırımda işğalcilernen işbirlik yapmağa razı olğanını isbatladı.
Qırım Muhtar Cumhuriyeti ve Sevastopol (Aqyar) şeeri prokurorlığı bunı bildirdi.
"Öz vekâletlerini yerine ketirgende, mahküm etilgen adam istilâcı devletniñ siyasetini amelge keçirmeknen oğraşa ve yarımadada yerli öz-özüni idare etüv organlarınıñ işlevini temin ete. "Muhtaryiyet prokurorlığınıñ açıq qabaatlavı sebebinden "Simferopol şeer memuriyetiniñ reisiniñ muavini" işbirlik faaliyetinde qabaatlı tanıldı (Ukrayina Ceza qanunnamesiniñ 111-1 maddesiniñ 5-inci qısmı)", — dep haberde bildirildi.
Mahsus mahkemeden evelki tahqiqatnı UHHniñ Qırım MCdeki Baş idaresi keçirdi. Tahqiqatnıñ malümatına köre, 2020 senesi mahküm etilgen adam "qurucılıq ve mimarlıq naziriniñ muavini" vazifesine tayin etildi. 2022 senesinden başlap Simferopol (Aqmescit) şeeriniñ işğalli memuriyetiniñ reisiniñ muavini vazifesinde buluna ve kapital qurucılığı saası içün mesüliyetli ola. Bundan ğayrı, faal cemaat faaliyeti alıp bara, Kremlge qoltutqan matbuat vastalarında çıqışta buluna ve Kremlniñ ikâyelerini yaza.
"Ukrayinanıñ nezaret etilmegen toprağında bulunğanı içün, oña qarşı yapılğan cinayetler içün mesüliyetke çekmek içün kompleks tedbirler alıp barıla", — dep UHH bildirdi.
Qırım Muhtar Cumhuriyeti prokurorlığı qoştı ki, oña 6 yıl apis cezasını, devlet akimiyeti, yerli idare organları, müessiseler, teşkilâtlar ve şirketlerde teşkiliy-tertipke riayet etüv ve memuriy-içtimaiy vazifelerni eda etüv aqqından 10 yılğa marum etüv ve mülkniñ musadere etilüv cezasını berdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
