Arman ayınıñ 5-nde işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) "Lübımivka-2" plâjı civarında deñizde 50 metrlik mesafede uçucısız uçaq aleti tapıldı. İşğalli akimiyet, bu ukrayin dronı olğanını ve yalı boyu turistlerni tahliye etkenini bildirdi.
Sevastopol (Aqyar) "gubernatorı" Razvojayev Telegramda bunı bildirdi.
"Lübımivka-2 plâjı rayonında yalıdan 50 metr uzaqlıqta uçucısız uçaq aleti tapıldı. Ğaliba, onı REB quvetleri bastırğan ya da USQniñ Sevastopolğa ücümlerinden birinde urıp tüşürgen. Şimdi bu yer sarıp alınğan, insanlar tahliye etile", — dep haberde qayd etildi.
Razvojayevniñ aytqanına köre, şimdi mütehassıslar qarar alalar: ya dronnı anda yoq etecekler, ya da onı ileride qullanmaq içün alıp ketecekler.
Arman ayınıñ 4-nde UHH işğal etilgen Qırımda "Saq" ava limanında mahsus tedbir keçirgenini bildirdi. Havfsızlıq hızmetiniñ malümatına köre, ukrayin uçucısız uçaq aletleri 5 Rusiye qırıcı uçağını urdı, bir Su-30SM bütünley yoq etildi.
Hatırlatamız ki, işğal etilgen Sevastopolda (Aqyarda) Rusiye arbiy hızmetçileriniñ noqtaları ve obyektlerine qarşı silâlı quvetlerniñ ücümleriniñ aqibetlerini derc etmege yasaq ettiler. Bundan da ğayrı, işğalcilerniñ AMS ve arbiy tehnikasınıñ yerleşken yerlerini aydınlata bilecek materiallarnı tarqatmağa yasaq etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
