İşğal etilgen Qırımda yasaq etilgen timsallerniñ numayışınen bağlı bütün mahkeme davalarınıñ 56%-inden ziyadesi ukrayin timsallerinen bağlı. Ekinci yerde — "AUE" cinaiy alt medeniyetiniñ tatuirovka taşıyıcıları, ve tek üçünci yerde — natsist timsallerini köstergen şahıslar. Uquq qorçalayıcılar 2025 senesi 96 mahkeme davasını talil etip, ukrayin devlet timsallerini numayış etüvde eñ sert cezalar berilgenini qayd ettiler — qabaatlanğanlarnıñ 26%-i apiske alındı.
"Qırım esnası" uquq qorçalayıcı teşebbüsi tedqiqatnı keçirdi.
"Soñki yarım yıl devamında Qırım mahkemelerinde "Natsi, aşırıcı ve diger yasaq etilgen timsallerniñ teşviqatı ya da numayış etilmesi aqqında" 20.3-nci maddesi boyunca baqılğan 96 dava talil etildi. Birinci yerde Ukrayina tarafdarları, ekincide — "AUE" cinaiy alt medeniyetiniñ tatuları, üçüncide ise — natsist timsallerini köstergen şahıslar belgineldi", — dep teşebbüsniñ mütehassısları añlattılar.
Tedqiqat müellifleriniñ aytqanlarına köre, işğal etilgen Qırımda ukrayin kimligini köstergenler içün taqip etilgenlerniñ sayısı alman natsizminiñ tarafdarlarına nisbeten üç qat ziyade. Bundan da ğayrı, Ukrayina tarafdarlarınıñ taqip etilüvi "ahlâqiy aşağılavlar, qoşma qabaatlavlar ve teşviqat matbuat vastalarında agressiv haber destek"nen keçe.
"Ukrayin davalarınıñ aman-aman yarısında qoşma qabaatlavlar bar — itibardan tüşürüv, zorbalıq ya da poliske qarşılıq kösterüv, natsizm teşviqatı davasınıñ iç birinde böyle bir şey yoq. Ukrayin kimligi içün tutulğanlarnıñ dörtten biri fizikiy zorbalıq ve maneviy alçaqlav videolarınıñ tarqatıluvınen qarşılaşa, soñki yarım yılda natsizm tarafdarları arasında tek bir böyle adise qayd etildi", — dep tedqiqat müellifleri qayd ettiler.
Uquq qorçalayıcılar şunı da qoştılar ki, natsist, aşırıcı ve başqa yasaq etilgen timsallerniñ teşviqatı ya da numayış etilmesi içün cezalar mevzuğa köre farqlana. Yasaqlanğan "AUE" cinaiy alt medeniyetiniñ tatuirovka taşıyıcılarına apis cezası berilmedi, "ukrayin gruppası" içün ise apis cezası eñ yüksek oldı — eñ az 26%.
Daa evel "Qırım esnası"nıñ uquq qorçalayıcıları Ukrayina tarafdarı olğanları içün taqiplerniñ mahkeme ameliyatını ögrenip, hulâsa çıqardılar ki, "natsizm ve aşırıcı teciqatınen küreş işğal etilgen topraqta tek resmiy sebep olaraq qullanıla ve Ukrayinağa nisbeten er angi sempati ifadeleri içün qullanıla".
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
