Qırımnıñ işğalci akimiyeti, Yalta deñiz limanınıñ 100% aktsiyalarını satmaq içün auktsionnı yekünledi. Yekâne tenderci, Moskvadan kelgen "Çernomorskoye razvitiye" mikrokompaniyası oldı, o 2025 senesi çeçek ayında teşkil etilgen. O, "Angaje" qapalı aktsiyalar yatırım fondunıñ nezareti astında, onıñ soñki benefitsiarı Volodımır Putinniñ yaqın şerikçisi – Arkadiy Rotenbergtir.
Bunı RF, "Torğı" devlet malümat sistemasınıñ sicilinden alınğan malümatlar isbatlay.
Kompaniya, limannı 1,49 milliard ruble (733,3 million grn) başlanğıç fiyatınen satın aldı.
Liman territoriyasında yahta turizmi içün inşaatnıñ yaratılması boyunca büyük leyha planlaştırıla.
Yalta deñiz limanına yılına 1,3 millionğa qadar yolcunı qabul etmege imkânı olğan yolcu terminalı ve çeşit türlü yüklerni yüklemek içün yük terminalı kire. Suv meydanınıñ umumiy meydanlığı, 12,15 gektarnı teşkil ete, köçme mülk ise 32 biñden ziyade m.kv.
Yalta limanınen bir vaqıtta Kezlev limanınıñ aktsiyaları auktsionğa qoyuldı, amma olar lâğu etildi.
Hatırlatayıq ki, 2014 senesi Qırımnı Rusiye işğal etken soñ, Ukraina yarımadanıñ bütün limanlarını halqara gemicilik içün qapattı. Ukraina Tış işler nazirligi, bir qaç kereler qayd etti ki, yarımada territoriyasında Rusiye Federatsiyası yurisdiktsiyası astında yapılğan bütün uquqiy añlaşmalarnıñ uquqiy küçü yoq ve olar halqara uquqnı bozalar.
Yarım yıl içinde Qırımnıñ işğalcileri evelki yıllarda qırımlılardan tutıp alınğan 25 obyektni 2,2 milliard rubleden ziyade parağa sattılar. Paranıñ bir qısmı, Rusiye Silâlı Quvetleriniñ askerlerine ve olarnıñ qorantalarına yardım etmek içün yollanacaq, dep bildirdi işğalci Qırım parlamentiniñ "reisi" Volodımır Konstantinov.
Telegram, WhatsApp, Facebook ve YouTube-ta Suspilne Qırım haberlerine abune oluñız
