Ukraina tış işler naziri Andriy Sıbiga, oraq aynıñ 31 Ukraina musulmanlarınıñ ruhiy idaresi (UMRİ) "Umma" baş camisi ve Kiyevdeki İslâm medeniy merkezine Rusiyeniñ raketa ücümini musulman memleketlerini, cemaatlarını ve teşkilâtlarını qabaatlamağa çağırdı.
Bu aqta o, öz X saifesinde bildirdi.
Ukraina TİN-niñ başı, bunı "Moskva insanlıqnıñ temellerine qarşı cinaiy cenk alıp barğanını" ve "Rus terrorı kimseniñ acınmağanını" daa bir numayış dep adlandırdı.
"Biz bütün musulman memleketlerini, halqara ükümet ve ükümetke ait olmağan teşkilâtlarnı, em de bütün dünya musulman cemiyetlerini öz mevamını bildirmege, bu ücümge cevabını köstermege ve qabaatlamağa çağıramız", — dep qayd etti Sıbiga.
Oña köre, "Rusiyeniñ varvarlığına" dünyanıñ quveti ve birligi qarşı çıqmaq kerek, onı beraberlikte "cenkke ve terrorğa soñ qoymağa" mecbur etmek kerek.
Bundan evel "Umma" UMRİ müftisi Murat Suleymanov, oraq aynıñ 31 camiden tahminen 50 metr uzaqlıqta rus raketası tüşkenini, onıñ parçaları cami binasına qoşma zarar ketirgenini bildirdi.
Müftiniñ aytqanına köre, bu Ukrainanıñ eñ büyük camilerinden biridir, anda cuma künü biñlernen izdeşler namazğa toplana. Cami binasında bütün pencere ve qapular qırılğan edi. Kompleksniñ territoriyasında gimnaziya ve Ukraina musulmanları kongressiniñ ofisi de yerleşken, olar da emiyetli yıqıntılarğa oğradılar.
Suleymanov qoştı ki, şimdiki vaqıtta yerli musulman cemaatı zarar körgen binalarnı tiklevinde faal iştirak ete.
Aynı vaqıtta Ukraina Prezidentiniñ QMC-deki vekilligi, bu ücümini "Rusiyeniñ daa bir cenk cinayeti" dep adlandırdı.
"Mesken binalarına, diniy ve medeniy binağa ücümler – bu tınç halqnı qorquzmağa nisbeten terrornıñ daa bir çeşitidir", – dep qayd ettiler idarede.
Hatırlatamız ki, oraq aynıñ 31 gecesi Rusiye ordusı, Kiyevge dronlar ve raketalarnen ücüm etti. Şeerniñ bir qaç rayonında zararlar qayd etildi. 82 adam yaralandı, olardan 44-yu hastahanege yerleştirildi. Eñ azdan yedi adam elâk oldı. Qurbanlarnıñ sayısı arta bile.
Telegram, WhatsApp, Facebook ve YouTube-ta Suspilne Qırım haberlerine abune oluñız
