Saba oraq aynıñ 31 Kiyev boyunca Rusiyeniñ raketalı uruvı sebebinden Ukraina musulmanlarnıñ ruhiy idaresiniñ (UMRİ) baş camisi "Umma" ve İslam medeniy merkeziniñ binası zarar körgen. Qurbanlar yoq.
Bu aqta "Umma" adlı UMRİ-niñ müftiyi Murat Suleymanov, öz Facebook saifesinde bildirdi.
UPD: Suleymanov Suspilne-ge rusiyeniñ "İskander" raketası binadan 50 metr uzaqlıqtaki caminiñ territoriyasına tüşkenini ve ondan çıqqan qaldıqlar onı içeklegenini ayttı.
"Bizim camimizniñ territoriyasında, ruhiy idareden ğayrı, cemaat teşkilâtları da bar, meselâ, Ukraina musulmanlarınıñ kongresi. Bizde de "Bizim kelecegimiz" gimnaziyası bar, anda bizim balalarımız 1-nci sınıftan 12-nci sınıfqace oquylar. Yani mektep-gimnaziya, ve cemaat idaresi – o, bütünley zararlandı", — dedi müfti.
Musulman cemaatı, saba binanıñ yañıdan qurulmasına yardım ete. Buña devletni de celp etmege planlaştıralar.
ÜTİ naziri Andriy Sıbiga, musulman memleketlerini, cemaatlarnı ve teşkilâtlarını Rusiyeniñ Kiyevdeki camige ve İslâm medeniy merkezine raketa ücümini qabaatlamağa çağırdı.
Ukraina Tış işler nazirliginiñ başı, bunı "Moskva insanlıqnıñ temellerine qarşı cinaiy cenk alıp barğanını" ve "Rusiye terrorı kimseniñ acınmağanını" köstergen daa bir numayış dep adlandırdı.
Müfti, Ukraina Prezidentiniñ Qırımdaki vekilligine raketa camiden 50 metrge yaqın yerde tüşkenini, onıñ parçaçıqları binağa qoşma zarar ketirgenini ayttı.
Suleymanov qoştı ki, şimdiki vaqıtta yerli musulman cemaatı zarar körgen binalarnı tiklevinde faal sürette iştirak ete.
"Bu tecavuz areketi, Rusiyeniñ daa bir cenk cinayetidir. Mesken binalarına, diniy ve medeniy binalarına ücümler – tınç halqnı qorquzmağa nisbeten daa bir terror areketidir", – qayd ettiler idarede.
Müftiniñ sözlerine köre, o, cuma künü dua içün biñlerce mühlisini toplağan Ukrainadaki eñ büyük camilerinden biridir.
Kompleksniñ territoriyasında gimnaziya ve Ukraina musulmanları kongressiniñ ofisi de yerleşken, olar da emiyetli yıqıntılarğa oğradılar.
"Boysunmağanmız. Ğalebe qazanacağımıznı bilemiz, çünki o, adaletlik meselesidir. Ukraina endi yeñdi. Ve böyle areketler ile olarnıñ (rusiye arbiyleri – tarir) taqatı yoq, tek grajdan insanlarnı urıp, tek közyaş ve ağırlıq ketirgenini yapıp olalar. Buna köre, Allah, olarnıñ episilerine bu ve kelecek ömürde cezasını berecek", – qayd etti Suleymanov.
Hatırlatayıq ki, oraq aynıñ 31 gecesine RF-nıñ ordusı, Kiyevni dronlar ve raketalar ile ücüm etken. Zararlar şeerniñ bir qaç rayonında qayd etilgen. 52 insan zarar körgen, olardan 30 soyu hastahanege alınğan. Eñ azdan altı insan elâk olğan.
Telegram, WhatsApp, Facebook ve YouTube-ta Suspilne Qırım haberlerine abune oluñız
