2024 senesi ilk küz aynıñ 11-de Qırım yalısı yanında keçirilgen mahsus areket vaqtında Ukraina Mudafaa Nazirliginiñ Baş istihbarat idaresiniñ "Timur mahsus bölügi"niñ terkibinde olğan "Qarğa gruppası" bölüginiñ cenkçileri birinci kere FPV-dronlarını cenkâver qullanuvını eda etip, olarnı açıq deñizde attılar.
Oraq aynıñ 29-da İBİ-de yañı kadrlarnen arhiv videosı kösterildi.
"Ameliyatnıñ bu aqiqatı sayesinde İBİ-niñ askerleri Qara deñizdeki "Petro Godovanets" gaz çıqaruv platformasında duşmannıñ ateş küçüni bastırıp oldılar. İşğalciler kadr ve tehnika ceetten coyumlarğa oğradılar. Ukraina deñizi oğrunda küreş devam ete!" – dep qayd etti istihbarat.
Hatırlatamız ki, 2024 senesi ilk küz aynıñ 11 künü İBİ mahsus küçleri Qara deñizde muvafaqiyetli areket keçirdiler. "Petro Godovanets" ("Krım-2") burav inşaatına ücüm vaqtında rus askerlerine büyük coyumlar ketirildi. Hususan, Su-30SM mahv eticisi yoq etildi.
İBİ mahv eticileri urğan "Krım-2" burav inşaatı, 2014 senesi Rusiye tarafından zapt etilgen platformalardan biridir, evel "Boyko burav inşaatları" olaraq belli edi.
Bu gaz çıqaruv platformaları Yuriy Boyko energetika naziri vazifesinde bulunğan vaqıtlarda quruldı, Qırımnı zapt etken soñ, Rusiye olarğa "Krım-1" ve "Krım-2" adlarını berdi. Ustanovkalar 30 küngece mustaqil çalışmağa imkân bere ve gemide 120 adamğa qadar yerleştirile.
İşğal etilgen Saki şeerinde yerleşken Rusiye aviatsiyasınıñ 43-nci ayrı deñiz aviatsiya polkunıñ terkibinde olğan Su-30SM mahv etici ukrain askerlerine muvafaqiyetli urğan soñ deñizge tüşti.
Saba saat 5:00-de uçaqnen alâqa ğayıp oldı ve Rusiye küçleri deral An-26 uçaqları ve Mi-8 ve Ka-27 vertolötları yardımınen qıdıruv-qurtaruv areketini başladılar. Bir qaç saattan soñ Tarhankut burnundan 70 kilometr şimaliy-ğarpta uçaqnıñ sınıqları ve aviatsiya yaqıtınıñ bir lekesi tapıldı.
50 million dollar miqdarında qıymet kesilgen Su-30SM mahv eticisiniñ yoq etilmesi vilâyetteki rusiye küçlerine müim zarbası oldı ve ukrain mahsus küçleriniñ rus basqıncılarınen qarşılaşuvda semereliligini tasdıqladı.
Telegram, WhatsApp, Facebook ve YouTube-ta Suspilne Qırım haberlerine abune oluñız
