Başqurtistannıñ Salauat şeeriniñ 2 sanlı müstemlekesinde ceza müddetini keçirgen qırımlı siyasiy mabusı Vadım Siruk, tişleri ile ağır meselelerge oğray. Onıñ apayınıñ aytqanına köre, müessisede çoqtan berli tiş ekimi yoq, Siruqnıñ tişleriniñ çoqusı ağır vaziyette.
Bu aqta onıñ ömür arqadaşı Anna Bogaçeva, Qırım birdemligine körüşüvden soñ bildirdi.
"Tişler çürüy, çünki müstemlekede tiş ekimi yoq. Bütün doquz yıllıq apiske alınğan vaqıt devamında olarnı az-çoq tek bir kere tedaviylediler, taclar qoydılar. Şimdi ise olar tüşeler ya da sadece yaramay vaziyette. Taclar keyfiyetsiz olğanı içün, aş olarnıñ tübünde yapışıp qala, Vadim de yalıñızlıq devam ete. Diger hasta tişlerni apishane şaraitinde tedaviylemek mümkün olmağanı içün çıqardılar", — dedi Anna Bogaçova.
Onıñ aytqanına köre, qoranta müstemleke idaresine ekim almaq ricasınen bir qaç kere muracaat etti, amma cevap almadı. Anna Bogaçova da bu sefer aqayınen üç kün degil de, altı kün qalmağa ruhset berilgenini bildirdi, çünki müstemlekede çalışqanlarnı ruhlandıralar. Vadım Siruk, aftada altı kün tikiş ustahanesinde çalışa.
Vadım Siruk aqqında ne bilemiz
Vadım cemiyetniñ faal azası edi, diniy binalarnıñ, hususan Vasilivka köyündeki caminiñ ğayrıdan tiklenüvine qoşuldı, Simeizde qadimiy mezarlıqnı qorçaladı, bayram tedbirlerini teşkil etti ve diniy merasimlerde iştirak etti.
Qırım işğali ve istilâsı sebebinden Rusiye tarafından repressiyalar ve taqipler başlanğan soñ Vadım siyasiy mabüslerniñ qorantalarına faal destek kösterdi, qanunsız "makemeler"ge barıp, siyasiy mabüslerniñ qorantalarına maneviy ve maddiy destek kösterdi.
2016 senesi kiçik ayınıñ 11-nde işğal etilgen Yalta ve Aluştada işğalli memuriyetniñ quvetçileri yerli sakinlerniñ evlerinde qanunsız kütleviy tintüvler keçirdi. O künü Vadım Siruknen beraber diniy erbap Muslim Aliyev, uquq qorçalayıcı Emir-Usein Kuku ve mektep qorçalayıcısı İnver Bekirov tutuldı.
2020 senesi bozarğannıñ 25-nde Rusiyeniñ Moskva vilâyetindeki Vlasiha şeer makemesi Vadım Siruknıñ istinaf şikâyetini red etti.
Appelâtsiya red etilgen soñ, siyasiy mabüs Qırımdan 2000 km uzaqlıqta yerleşken Rusiye Federatsiyasınıñ Başqırstan Cumhuriyetiniñ Salavat şeerindeki İK-2 müstemlekesine etap etildi.
O, anda kelgende, qanunsız alda 17 künge ceza izolâtorına qapatıldı. Bundan da ğayrı, yaramay ava, yahşı anşama ve vitamin qıtlığı sebebinsen, siyasiy mabüsniñ sağlığı daima fenalaşa. Bundan da ğayrı, onıñ tişlerinem meseleleri bar, apishaneniñ tiş ekimi ise kerekli yardım köstermek içün kelmey.
Telegram, WhatsApp, Facebook ve YouTube-ta Suspilne Qırım haberlerine abune oluñız
