Bütün Qırımda işğalciler tarafından 2025 senesi oraq aynıñ 29 - arman aynıñ 1 kününe qadar havflı gidrometeorologik adiseler aqqında furtuna haberdarlığı ilân etildi.
Bunıñ aqqında Qırımnıñ işğal Fevqulâde vaziyetleri nazirligi haber etti.
"Qırım gidrometeorologiya ve etraf müit nezareti idaresiniñ malümatına köre, oraq aynıñ 29-dan arman aynıñ 1-ne qadar Qırımnıñ ğarbiy, merkeziy, cenübiy ve şarqiy rayonlarında ve Sevastopolde (Aqyar) fevqulâde yanğın havfı qalır", — denile beyanatta.
İşğalci Fevqulâde vaziyetler nazirligi, vatandaşlarnı quru ot ve çöplüklerni yaqmamağa, sönmegen sigar tübülerni atmamağa çağıra ve yarımadada mayısnıñ 1-den başlap areket etken mahsus yanğın profilaktikası rejiminiñ qaidelerini bozğanları içün memuriy cevapkârlıqnı hatırlata.
Telegram, WhatsApp, Facebook ve YouTube-ta Suspilne Qırım haberlerine abune oluñız
