İşğal etilgen Qırımda Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonınıñ Pervomayske köyüniñ sakini Zlata Spivak "qanunsız miting teşkil etkeni" içün 20 biñ rublelik (tahminen 10 biñ ğrıvnâ) para cezasını aldı. O, Telegramda, suv qıtlığı sebebinden ola bilecek narazılıq aktsiyası aqqında yazdı.
Bunı Qırım.Aqiqat bildirdi.
Quvetçilerniñ aytqanına köre, Spivak köyde suv teminatınen bağlı meseleler sebebinden mitingge çağırdı. Mahkeme vesiqalarında qayd etilgenine köre, qadın 30 iştirakçisi olğan "Pervomayske" Telegram çatında böyle bir beyanatnı tarqattı. Yazıda, suv meselesi çezilmese, yerli sakinler narazılıq bildirmege azır olğanı aqqında aytıla.
"Qırım sakini, suv teminatınen bağlı meseleni çezmek maqsadınen cemaat tedbirini teşkil etip, cemaat tedbiriniñ keçirilüvi aqqında bildirüvni bermeyip, 2004 senesi ilk yaz ayınıñ 19-nda qabul etilgen 54-FZ-nci Federal qanunını bozdı", — dep mahkeme qararında qayd etildi.
Qadın mahkemede qabaatını tanımadı. Onıñ aytqanına köre, o, yerli akimiyet vekillerinen vaziyetni muzakere etip, sakinlerniñ reaktsiyası aqqında tenbiyeley edi.
Spivaknıñ aytqanına köre, tutulğan künü altı quvetçi onıñ evine kelip, silâ ve narkotik qıdıralar, soñra ise onı mahkemege alıp keteler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
