Avropa insan aqları mahkemesi "Borovınskıy ve digerleri Rusiyege qarşı" davasında qarar aldı, bu ise, Rusiye Federatsiyasınıñ, hususan işğal etilgen Qırımda yapqan cinayetleri boyunca kelecek halqara davalarda esas delil ola bile.
QırımSOSnıñ halqara adliyeci mütehassısı Artem Oliynık bunı bildirdi.
“Qayd etmek kerek ki, qarar kompleks olaraq müimdir — isbat bazasınıñ toplanması ve ilerideki davalarda qullanıla bilecek Rusiyege nisbeten qabaatlavnıñ obyektiv tanılması kibi”, — dep Artem Oliynık qayd etti.
Mütehassısnıñ aytqanına köre, halqara mahkemelerniñ qararları sadece zarar körgenler içün tazminat degil de, qanunsız areketlerniñ toqtatılması içün de müimdir.
“Avropa insan aqları mahkemesiniñ ve bunıñ kibi halqara organlarnıñ qıymeti, zarar körgenlerge bir de bir tazminat bermek degil (teessüf ki, repressiv sistema ketirgen zararı ve sağlıq meseleleri sebebinden bu pek müimdir), amma böyle qanunsız ameliyatnı toqtatmaq ve insanlarnıñ esas aqları ve serbestliklerine, şu cümleden söz ve vicdan serbestligine sayğı kösterilmesini talap etmek", — dep mütehassıs qayd etti.
Davadaki vaqialar 2022 senesi saban ayınıñ başında, Rusiye Federatsiyası daa resmen Avropa Şurasınıñ azası olğanda ve Avropa mahkemesiniñ yurisdiktsiyası altında olğanda yüz berdi.
Şimdilik mahkeme biñlernen dava baqmaqta. Aynı zamanda, Rusiye Avropa Şurasından çıqqan soñ ve 2022 senesi sabannıñ 15-ne qadar küçke kirmegen Avropa mahkemesiniñ qararlarını yerine ketirmege yasaq etken qanun qabul etilgen soñ, istilâcı devletke tesir etmek içün uquqiy aletler pek sıñırlandı.
Hatırlatamız ki, Avropa insan aqları mahkemesi Rusiyede ve işğal etilgen topraqlarda, hususan Qırımda, cenkke qarşı mevam içün yapılğan repressiyalarnı insan aqlarınıñ bozuluvı olaraq tanıdı. "Rusiye ordusınıñ itibarını tüşürüv" maddesine köre para cezaları ve apis cezası aqqında söz yürsetile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
