Oraq ayınıñ 8-nde işğal etilgen Qırımnıñ Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) Fedor gemisi ukrayin boğdayını yüklep, Mısırğa yol aldı. DAMAS WAVE, hırsızlanğan ububatnen Suriyege seferlerni yapmağa devam ete.
"Mırotvorets" Merkeziniñ jurnalisti Katerına Yaresko öz X saifesinde, geminiñ İskenderiyadan kelgenini ve oraq ayınıñ 8-nde yüklengenini bildirdi.
Oraq ayınıñ 11-nde de DAMAS WAVE Qara deñizge Tartustan (Suriye) kirdi.
"Bu, DAMAS WAVEniñ bu marşrut boyunca ekinci seferidir, birinci seferde Tartus limanında 2025 s. çiçek ayınıñ 18-20 künleri boşatıldı, işğal etilgen Feodosiyada ise 15.03.2025 künü yerleştirildi. Böylece, Suriyege hırsızlanğan ukrayin ububatınıñ ketirilmesi ğayrıdan tiklendi", — dep jurnalist qayd etti.
Hatırlatamız ki, ukrayin uquq qorçalayıcıları Rusiyeniñ sabıq köy hocalığı naziri Dmitriy Patruşevge Ukrayinada cenk cinayetleri yapqanında ğıyabiy şekilde şübhe bildirdi. Baş prokurorlıqnıñ malümatına köre, o, hırsızlanğan ukrayin ububatınıñ Qırımğa ketirilmesini temin ete edi, andan ise Rusiye mahsulatı olaraq Yaqın Şarq ve Şimaliy Afrika memleketlerine ihrac etile edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
