Oraq aynıñ 13 Qırımda alâqa ve mobil internet bozuqlıqları qayd etildi. Qullanıcılar "Devlet hızmetlerinde", Telegram messenceriniñ işinde, VPN hızmetlerinde, em de ayrı provayderlerde ve mobil operatorlarda tölevler ve ruhset berüv meselelerinden şikâyet eteler.
Monitoring resursı Downdetector, Qırımdaki meseleler aqqında haber ete.
Qırım sakinleri bu sayttaki tefsirlerde şikâyet ve fikirlerini qaldıralar. Eñ çoq – mobil internetniñ olmağanı aqqında. Resursnıñ statistikasına köre, qırımlılarnıñ çoqusında Telegram messenceri, em de "Miranda-media" telekommunikatsiya hızmetleri provayderi, "Volna Mobil" rusiye mobil operatorı, "MTS" ve "Planet VPN" VPN hızmetleri yoq.
"Kafanews" yerli neşiri haber etkenleri kibi, "bazı qullanıcılarnıñ eñ müim hızmetlerge kirişte meseleleri bar — aqça tölev qullanmaları (Sberbank) ameliyatlarnı keçiktire, "Devlet hızmetleri" portalında ruhset berüv ise bir qaç daqqa devam ete bile".
Suspilne Qırımdaki menbaları işğal yarımadanıñ çeşit şeerlerinde soñki vaqıtlarda mobil internet üzülmelernen çalışqanını, ya da bütünley söndürilgenini bildirgen malümatnı tasdiqlaylar.
Bu arada Rusiye neşirleri işğalci akimiyeti "Qırımğa ücüm yapqan ve yerli sim-kartalarnı qullanğan ukrain dronlarını sustırmaq" içün, idda etilgenine köre, alâqalarını söndürgenini yaza.
Hatırlatamız ki, bütün bu afta devamında 2025 senesi oraq aynıñ 7-den 12-ge qadar Rusiye Federatsiyası Mudafaa Nazirligi açıq menbalarda yıqılğan ukrain dronları aqqında bir qaç kere haber etti. Bu malümatlarğa esaslanıp, afta içinde Qırım üstünde Ukraina Mudafaa Quvetleriniñ 28 dronı urıp tüşürilgen. Ukraina tarafı, dronlar yardımınen yarımadağa avia ücümler yapılğanı aqqında resmiy tarzda haber etmedi.
Telegram, WhatsApp, Facebook ve YouTube-ta Suspilne Qırım haberlerine abune oluñız
