Vaqtınca işğal etilgen Qırımda yerli ealige qarşı basqılar dalğası devam etmekte. Rusiye havfsızlıq küçleri adamlarnı ukrain tarafdarı mevamı, hususan içtimaiy ağlardaki fikirleri içün daima tutıp alalar, em de olarnı “satqınlıq”, “ekstremizm” ve “terrorizmniñ aqlamasında” qabaatlaylar.
Suspilne Qırım, oraq aynıñ 7-13 aftanıñ neticelerini topladı: qanunsız tutuvlar ve cezalar aqqında umumiy malümat.
RF-nıñ İnterpolğa talabı ile Frenkistanda bir qırımtatarı tutulğan – QRM
33 yaşındaki qırımtatarı İlnur Şagayev, FTH-niñ talabınen Frenkistanda İnterpol tarafından yaqalandı. O, qorantasınen beraber Qırımdan atta büyük miqyaslı ücüminden evel çıqıp, İrlandiyada muvaqqat qorçalav aldı. Apiske alınuv, Büyük Britaniyağa ketken paromğa mingende olıp keçti.
Bunıñ aqqında Qırımtatar resurs merkezinde bildirdiler.
Ruslar Ğennadiy Lımeşkonı "terrorist ve aşırıcı" cedveline kirsettiler: onıñ bulunğan yeri şimdilik belli degil
Rusiye Federatsiyasınıñ maliye nezareti federal hızmetiniñ saytında "terroristler ve aşırıcılar" cedveli yañartıldı. Ğennadiy Lımeşko aqqında malümat Rosfinmonitoring saytında peyda oldı.
Oña 2018 senesi işğalli Qırım akimiyeti tarafından işğal etilgen yarımadada "diversiya azırlağanı" içün mahküm etilgen ukrayinalı Ğennadiy Lımeşkonı kirsettiler. 8 yıllıq qanunsız apis cezasını çekken soñ Ğennadiy Lımeşkonıñ bulunğan yeri alâ daa belli degil.
İşğalciler Yalta sakinini terror aktını azırlağanda qabaatlap, yaqaladılar
Qırımda işğalli FSB, Yalta sakinini Ukrayina mahsus hızmetleri içün terror aktını azırlağanında qabaatlap, yaqaladı. RİA "Novosti Krım" bu aqqında haber etti.
"Buña ait olğan Yalta sakini tevqif etildi. Ondan eki bomba tutıp alındı, dep Rusiye FSBsiniñ Cemaat bağları merkezi bildirdi. Qayd etildi ki, Ukrayina tarafından berilgen emirge binaen, adam Rusiye Künü bayramı vaqtında ücüm etmek içün patlayıcı cihaznen dronnı azırlamaq kerek edi", — dep aytıla haberde.
Qırımda bir qaç qırımtatarı tutıp alınğan
Qırımda FTH, işğalde bulunğan soy-soplarını ziyaret etmek içün yarımadağa qaytıp kelgen bir qaç qırımtatarnı yaqaladı.
Şimdilik işğalciler tarafından aynı nasıl qabaatlavlar qoyulğanı belli degil, bildirdi qırımtatar halqı Meclisiniñ reisi Refat Çubarov.
Qırımda qadınğa narazılıqqa çıqmaq kerekligi aqqında tenbiyelegeni içün cöreme ödettiler
Qırımnıñ Qurman rayonınıñ Pervomaysk qasabasında yaşağan qadınğa suv olmağanı sebebinden narazılıqqa baracağı aqqında haber bergeni içün işğalciler 20 biñ ruble (tahminen 13 biñ grivna) miqdarında cöreme ödettiler. Bu aqta Milliy tirenüv merkezi bildirdi.
Telegram, WhatsApp, Facebook ve YouTube-ta Suspilne Qırım haberlerine abune oluñız
